siuarsaaneq
Greenland Venture softwaremut nunatsinneersumut aningaasaliivoq
Namminersorlutik Oqartussat aningaasaliinissamut piginneqatigiiffiata suliffeqarfik Reply ApS aningaasaliiffigaa, taanna mobilinut programinik suliaqartarpoq
Mobilinit nutaaliaasunit tamatta ilisimavagut: App'it - programmit mikisut, soorlu Nuup Bussiisa ingerlaarfiinik takutitsisinnaasut, imaluunniit aningaaserivimmi kontoppit imaanik ajornanngitsumik takutitsisinnaasut.
Maannalu Nunatsinni programminik ineriartortinneqarsimasunik amerlanerusunik saqqummertoqartalilerpoq.
Aningaasaliineq
Namminersorlutik Oqartussat aningaasaliinissamut piginneqatigiiffia, Greenland Venture, Nuummi suliffeqarfimmut Reply ApS-imut aningaasaliiniarluni aalajangerpoq, taanna aallartisaasumik Jens-Jakob Lennert-Sandgreenimit ingerlanneqarpoq.
Aningaasat programmip Replyp ineriartorteqqinnissaanut atorneqassapput, taanna Snapchatimut assersuunneqarsinnaavoq. Suliniut suliffeqarfimmut immikkut ittumut nuutsinneqarnissaanik, aningaasaliineq ilaatigut isumaqarpoq.
Atuaruk: Kalaallit teknologimik sanaavat Snapchatimut unammillertoq
Atuisut 4.000-t
Reply ukiaanerani 2014-imi saqqummerpoq, ingerlatsivillu naapertorlugu ullumikkut qaammammut 4.000-t missaaniittunik atuisoqarpoq.
- App'ip nunani tamalaani niuerutigineqarnerani, ukiup ataatsip affaatalu ingerlanerani ilikkagaqarsimaqaagut. Atuisutta 20 procentii Kiinameerput, Rusland aamma USA tulleralugit. Androidimik atorneqarsinnaanissarput qangali kissaatigisimavarput, smartphonenik atuisut affaat taakkunannga mobileqarmata, Jens-Jakob Lennert-Sandgreen ilisimatitsivoq.
Nutaaq
Aallartisaasut maanna programmip nutarsarneqarneranik aallartitsipput, maanna upernaaru saqqummertussatut naatsorsuutigineqartumik.
Jens-Jakob Lennert-Sandgreen aallartisaasutut aviisimik sapaatip-akunneranut saqqummertartoq, TiuTiu, ilisarisimaneqaatigaa. Taanna 2012-imi matuvoq.