Royal Arctic Line
Hammeken: Paasissutissiinerusassaagut
Royal Arctic Linep pilersaarutaasa siammarterneqarnerunissaat, pisortap Verner Hammekenip, oqaatigaa. Perlersaarutit qanoq ilisimatigineqarnerat pillugu misissuisoqarsimanera nuannaarutigaa
Royal Arctic Line A/S aamma Grønlands Erhverv/Sulisitsisut (GE) peqatigiillutik Royal Arctic Line-ip periusissiaa pillugu inuussutissarsiortut sullissat qanoq isumaqarnerat misissortissimavaat.
Apeqqusiat suliffeqarfinnut 457-inut nassiussuunneqarput, akissutillu 177-it periarfissaq kingulleq 2. februar 2018 qanngiutsinnagu immersorneqarsimallutik utertinneqarsimapput.
Paasissutissiinerunissaq
- Paasissutissiinerusariaqarpugut. Nuup avataani tamanna suliarineqarnerussasoq paasisinnaavarput. Tamanna uagut tungitsinnit suliarineqassaaq, qilanaaraarpullu. Apersorneqartut 36 procentiisa pilersaarutit ilisimaneqarnerat ajunngitsutut taasinnaavarput, Verner Hammeken Sermitsiaq.AG-mut oqarpoq.
Suliffeqarfinnik paasiniaanerit ingerlanneqarsimaneri nuannaarutigaa.
- Aningaasartuuteqarnermut suliassat pillugit qanoq aningaasartuuteqannginnerunissaq anguniarneqarpoq. Royal Arctic Linep sulissutigisaasa tatigineqarnerat nuannaarutissaavoq, Verner Hammeken oqarpoq.
Pisattat nassiunneqartartut akii appartinneqarnissaat suliffeqarfinnit naatsorsuutigineqarpoq. Tamanna piviusunngussava?
- Pitsaanerpaaq anguniarlugu sullississaagut. Assartuussinerup eqaannerulernissaa aningaasartuutikillisaanermik imaqartussaavoq, oqarpoq.
Periarfissat
Avammut tunisassiorsinnaaneq neriuuteqarluarfigaa:
- Avammut tunisaqarnermut periarfissanut tunngasuni apeqqummi suliffeqarfippassuit 'naluara'-mik akivaat. Avammut tunisassiornermut suliffeqarfippassuit suliaqanngillat, taamaammat taamatut akisoqarnissaa naatsorsuutigereerparput, RAL-imi pisortaq oqarpoq.
- Royal Arctic Linep siunissamut periusissiaa suliffeqarfinnut isumaqanngitsoq amerlasuunit isumaqarfigineqarpoq. Tamanna eqqunngitsoq qanoq uppernarsarsinnaaviuk?
- Aalborgimit Aarhusimut nuunnissamut atatillugu containerit pineqarnerupput. Niueqatigiinnissap pitsaanerulernissaa anguniarneqarpoq, taamaattumik suliffeqarfiit nutaat suliffeqarfioreersullu pitsaanerusumik sullinneqarsinnaalissapput. Unammilleqatigiittoqalissaaq. Suliffeqarfinnut pitsaanerpaaq anguniarlugu taamatut aalajangernikuuvugut, Verner Hammeken oqarpoq.