saarullittassat
IA Demokraatinut Atassummullu piumasaqarpoq
Naalakkersuisut aalisarnermut politikkiat Inuit Ataqatigiit isornartorsiorpaat nungusaataasumillu aalisarnertut taallugu. Partii illua'tungiliuttoq isumaqarpoq naalakkersuisooqatigiinni partiit mikineri iliuuseqaratik isiginnaaginnartut
Politikkikkut qangali assortuussutaalereerpoq aalisarnermut naalakkersuisoq aalajangermat ukioq maanna saarullinnik, Pinngortitaleriffiup inassuteqaataanit marloriaammik amerlanerusunik pisassiiniarluni.
Ullumi sisamanngornermi Inuit Ataqatigiit politikeri Siumumersoq tatiniaqqippaat.
– Naalakkersuisut aalisagaativut immeraassutigaat tamannalu nunatsinni aningaasarsiornermut, avatangiisinut minnerunngitsumillu inutsitut ajunaarnersuanngorsinnaavoq, Naaja Nathanielsen tusagassiorfinnut nalunaarutikkut allappoq.
Demokraatit Atassullu aamma tatisipput
Sapaatip akunnerani kingullermi Atassummeersup Steen Lyngep, kingornalu Demokraatineersut nuimasuut pingasut aalisarnermut naalakkersuisoq Karl-Kristian Kruse isumaqatiginagu nalunaarput.
Naaja Nathanielsenip ersissutigaa aalisarnermi iluatsinngitsumik iliuuseqarniarneq atituumik eqquissasoq.
– Akisussaanngitsuliornerulluinnarpoq, Naalakkersuisullu eqqaamasariaqarpaat aalisarneq nukittooq nunap tamarmi isumalluutigigaa. Aalisartut kisimik pinnatik - aammattaarli innuttaasut tamarmik pisortallu ingerlatsiviisa tamarmik.
Demokraatit politikkikkut oqaaseqartartuat Randi Vestergaard Evaldsen assigalugu politikerip IA-meersup eqqaasitsissutigaa Naalakkersuisut naalakkersuisooqatigiinnissamik isumaqatigiissut unioqqutikkaat, tassani qupperneq 6-imi allassimammat aalisarnermut politikkimi piujuartitsinissaq tunngaviussasoq.
– Naalakkersuisooqatigiinnissamik tunngavik amerlasuutigut oqaasiinnanngorsimavoq imaqanngitsoq. Assersuutigalugu aalisarnerup piujuartitsinissamik tunngaveqarnissaanik neriorsuut. Kanngunarpoq aalisarnermut politikkiminni Naalakkersuisut oqaaseq taanna atortuarmassuk, Nathanielsen allappoq, ilanngulluguli eqqaallugit sumiiffiit killeqanngitsumik qaleralinniarfiit aamma nungusaataasumik aalisarnertut assersuutissaasut.
Naalakkersuisooqatigiit iliuuseqaqquvai
Naaja Nathanielsenilu isumaqarpoq politikkimik isumaqatiginngisaminik tamanut ammasumik isorinninneq naammanngitsoq. Atassut Demokraatillu sammisatigut IA-mik isumaqatigiissuteqarfimmikkut iliuuseqarnissaat kissaatigaa.
– Naalakkersuisooqatigiit iliuuseqarnertik akisussaaffigisariaqarpaat. Demokraatit Atassullu kusanaatsuliorput pisassanik qaffaaneq isornartorsioriarlugu akisussaassuseqarnissamik piujuartitsinissamillu allannguinissamik piumasaqanngimmata, politikeri IA-meersoq allappoq.
– Atassut Demokraatillu isummatik iluuseqarnermik kinguneqartittariaqarpaat. Taamaanngippat naatsorsuutigisariaqarpoq partiit taakkua Siumup aalisarnermut politikkia tamakkiisumik tapersersoraat.