neriniartarfik
Igasoq neriniartarfimmik ammaalerpoq
Nuummi qaammatit pingajuat avillugu neriniartarfik ammasussaq igasumit Inunnguaq Hegelundimit ammarneqassaaq
- Nuummi kalaaliminernik neriniartarfeqanngilaq naak oqaluuserineqartuaraluartoq aamma pilersitsisoqarnissaa neriuutigineqartaraluartoq. Tamanna allanngortilerparput, Inunnguaq Hegelund tusagassiutinut nalunaarummi oqarpoq.
New Yorkimi neriniartarfeeqqatut ittumik ammaarusunnini igasup oqaatigaa. Neriniartarfimmi marsip aappaani ammartussami Nunatsinneersunik pisisoqarsinnaassaaq.
- Nunatsinni igaarineqartartut nutarterlugit pisiarineqarsinnaassapput, Inunnguaq Hegelund nassuiaavoq.
Aalisakkanik, susaasanik pinngortitamiillu pisarineqarsimasunik neriniartarfimmi pisisoqarsinnaassaaq. Ammartussaq Kalaaliaqqamik ateqassaaq imerniartarfimmi Takussimiissalluni.
Heca A/S-imi pisortap Nicolai J. Nissenip Inunnguaq Hegelund suleqatigaa.
- Una isumassarsiatsialaavoq. Innuttaasut kiisalu takornariat alutorissaqaat, tusagassiutinut nalunaarummi oqarpoq.
Iluatsilluassappat ataavartumik ammanissaa neriuutigineqarpoq. Qanoq soqutigineqartiginersoq apeqqutaajumaartoq Heca A/S-imit oqaatigineqarpoq.