Ikiorsiissutit pingasut atuuffii sivitsorneqarput

Coronap ajalusoortitsinera inuussutissarsiortut takornarialerisullu suli sakkortuumik malugisinnaalluarpaat. Taamaammat Naalakkersuisut ikiorsiissutinik pingasunik sivitsuipput.

Aningaasaqarnermut naalakkersuisoqarfiup tusagassiorfinnut nalunaarummini ilisimatitsissutigaa Inatsisartut aningaasanut akileraartarnermullu ataatsimiititaliaata akuersissutigisimagaa Naalakkersuisut ikiorsiissutinik 30. juni 2021 tungaanut sivitsuinissaat.

- Kalaallit Nunaannut tikinnermi ulluni tallimani mattusimasarnermik atulersitsineq kingusinnersukkut Naalakkersuisut atorunnaarsippassuk, ikiorsiissutit atuisunut (takornarianut) akikilliliissutaat ullut 30-t qaangiunneranni atorunnaassapput, taamaattoq kingusinnerpaamik ulloq 30. juni 2021, ilisimatitsissutigineqarpoq.

Ikiorsiissutit pingasuusut inuussutissarsiortunut takornarialerisunut toqqaannartumik ikiorsiissutaapput.

Ikiorsiissutit 45 milliuunit koruuninik aningaasartalerneqarput.

Ikiorsiissutit uku sivitsorneqarput:

• Ikiuigasuaatit 35 milliuunit koruuninik aningaasartalerlugit.
• Suliffeqarnermi ikiorsiissutit 7 mio. kr. aningaasartaqartut.
• Ingerlatsinermut ikiorsiissutit (soorlu unnuisarfinnut) 3 mio. kr.

Pissutsit immikkuullarissut

Naalakkersuisut upernaaq 2020-mili takornarialerisunut akunnittarfinnullu ikiorsiissutinik pilersitsipput. Maanna Naalakkersuisut nalilerpaat ikiorsiissutit sivitsornissaat pisariaqartoq, nunap suli angallannikkut matoqqagallarnera pissutigalugu:

- Takornariartitsinermik inuussutissarsiortut nunarsuarmi covid-19-p tunillaassuuneranut atatillugu matusinernit sakkortuumik eqqorneqarput. Taamaammat piffissami ajornakusoornartumi takornariartitsinermik inuussutissarsiortut ikiornissaat Naalakkersuisut kissaatigaat. Inuussutissarsiortut nappaatip tunillaassuunnerata qaangiunnerani siuariartoqqilernissaannut ikiorneqarnissaat siunertaavoq, inuussutissarsiornermut naalakkersuisoq Jens-Frederik Nielsen oqarpoq.

- Maanna pissutsit immikkorluinnaq inissisimanerat immikkorluinnaq ittunik aaqqissusiornissamik pisariaqartitsivoq, ikiorsiissutillu pissutsit inissisimanerinut iliuusaapput. Ikiorsiissutit ataavartumik aaqqiissutaannginnerat Naalakkersuisut erseqqissaatigissavaat, taakkumi pissutsit ajornerpaat qaangiunnissaasa tungaannaannut aaqqissugaagallartuupput, aningaasaqarnermut naalakkersuisoq, Vittus Qujaukitsoq ilaliivoq.

Ammaqqinnissamut nalorninartut

Kalaallit Nunaanni innuttaasut coronavirusimut akiuussutissalersorlugit kapuinerit aallartereerput. Nalorninarporli nunatsinni innuttaasut tamakkerlugit qaqugu akiuussutissaqalersimanersut, akiuussutissat naatsorsuutigisamik ikinnerusut nunatsinnit pineqartussanngormata. Nunatta Nakorsaaneqarfiani nakorsaq Paneeraq Noahsen 27. januar 2021 ilisimatitsivoq innuttaasut 6 procentingajai akiuussutissamik siullermeerlutik kapitereersimasut, aappassaanillu kapuinissat aallartilertut.

Nunarput avammut qaqugu ammarluassanersoq, taamatullu takornarialerineq qaqugu ingerlalluaqqilissanersoq, coronavirusip tunillaassornera pissutaalluni nalorninsarpoq. Taamaammat inuussutissarsiornermut naalakkersuisoqarfiup pissutsit akuttunngitsumik nalilersortarai ilisimatitsissutigineqarpoq.

Ikiorsiissutit allat misissorneqarput

Aatsitassanut naalakkersuisoqarfik ilisimatitsivoq aatsitassarsiornerup iluani kiffartuussisunut ikiorsiissuteqartoqalersinnaanersoq misissuiffigineqartut. Aatsitassarsiorneq nunap matusarneranit aamma killilersuutinit assigiinngitsunit sunnerneqartarpoq.

Aalisarnerup iluani ikiorsiissutit ukioq nutaamit qaangiuttut sivitsorneqaqqissanersut pillugit suleqatigiissitaq aamma misissuileruttortoq, aalisarnermut naalakkersuisoqarfimmi pisortaq Jørgen Isak Olsen ilisimatitsivoq.