Iluarsaassinermik suliaq eqqumiigineqartoq: Tamanna ajorluinnarpoq
Tele-Postip kiffartuunneqarnissamut isumaqatigiissummik atorunnaarsitsisimanerata kinguneranik kabelip immap naqqatigoortup iluarsaanneqarnissaanut umiarsuarmit immikkut ittumit ikiorneqarsinnaalernissap tungaanut piffissaq sivisooq ingerlasimavoq. Taama immikkut ilisimasallit arlallit oqarput, Tele-Postimilu pingaarnersiuineq eqqumiiginarnerarlugu. Tele-Postip pisortaata isornartorsiuineq tunngavissaqannginnerarpaa.
Nunarsuarmi nalunaarasuartaateqarnermik suliffeqarfiit akornanni kabelit immap naqqatigoortut attaveqaatit mianernarnerpaartaasa pingaaruteqarnerpaartaasalu ilaattut isigineqarput. Kisianni isorinnittut arlallit nalunaarasuartaateqarnermik suliaqarfimmeersut eqqumiigaat, Tele-Post kiffartuunneqarnissamut isumaqatigiissummik imaluunniit sillimmasiissutinik pilersitsisimanngimmat. Tamanna ingerlatseqatigiiffimmi kabelip immap naqqatigoortup kittorarnerisa pingasut umiarsuarmit immikkut ittumit siusinnerusukkut sukkanerusumillu iluarsaanneqarnissaannik qulakkeerinnissimassagaluarpoq Amerikamiut Canadamiut kabelinik immap naqqatigoortunik iluarsaassisartut Horizon Maritimemeersut umiarsuaata Horizon Enablerip suliarinninneranut sanilliullugu.
Aviisi Sermitsiaq taama allaaserisaqarpoq.
- Kabelini immap naqqatigoortuni kittorartoqaratarsinnaaneranut sillimmasiissuteqartarneq nalinginnaasumik ileqquuvoq. Sillimmasiissuteqanngikkaanni Tele-Postip tulleriiaani kingullerpaatut inissittoqartarpoq. Ingerlatseqatigiiffit kabelinut immap naqqatigoortunut sillimmasiissuteqartut siulliullugit sullinneqartarput, telemut tunngasuni immikkut ilisimasalik, Torben Rune, Danmarkimi suliffeqarfimmit it-mi, paasissutissani telemilu siunnersuisartumit Netplanimeersoq, oqarpoq.
Taassuma tikkuarpaa, inuit amerlanerpaartaat internettimik isumalluuteqartorujussuusut. Nutaarsiassanik isiginnaarnermuinnaanngitsoq aviisinillu atuarnerinnarmuinnaanngitsoq. Assersuutigalugu nunarsuarmi sumiiffippassuarni internetti ima annertutigisumik isumalluutigineqarpoq, nakorsat assersuutigalugu nakorsaatinik inniminniisinnaanngippata imaluunniit tarrarsuinikkut assilisanik naliliisitsisinnaanngippata tamanna inuuneq toqulu pillugu apeqqutinngorsinnaalluni.
Ingerlatseqatigiiffik internettimik ingerlatsisoq isertitaqartarpoq, kabeli aseroraangat ingerlatseqatigiiffiup annaasartagaanik. Aningaasarsiornerli tamanna pissutsini annertunerujussuarni annikitsuaraannaavoq, internettimik atuisut naleqarnerujussuarnik annaasaqartarmata, Torben Rune erseqqissaavoq.
– Tamakkua tamarmik ataatsimut katinneqarpata isumaqatigiissummik taama ittumik Tele-Postip pisimaneratut atorunnaarsitsineq immaqa isumatusaarneruallaanngilaq, oqarpoq.
Tele-Postip umiarsuaatileqatigiiffimmut immap naqqatigut kabelimik iluarsaasartumut kiffartuunneqarnissamut isumaqatigiissut 2017-ip atorunnaarsippaa. Kisianni Qaqortup avataani decembarimi 2018-imi kabelimi immap naqqatigoortumi aserortoqarpoq. Qaammat ataaseq qaangiummat allakkut kittorartoqarpoq, kabeli immap naqqatigoortoq Maniitsup Sisimiullu akornanni kilisaammit kittorarneqarmat. Tassanilu iluarsaassisoqarneranut atatillugu kittorarnerit pingajuat paasineqarpoq, tamatumuuna Sisimiut avannaanni.
Allaaserisaq tamaat Sermitsiami atuaruk – uani ataani aviisimut isissutissarsigit: