Ilulissani RAL-imi sulisut suliumajunnaartut
Ilulissani RAL-imi sulisut isumaqatigiinngissuteqartoqarnerani suliumajunnaarput. RAL-imi qullersat Ilulissanukalerput.
Ilulissani Royal Arctic Linemi sulisut arlallit, aqutsisunut isumaqatigiinngittoqarnera pissutigalugu ullumi suliartorumanatik nalunaarsimapput.
Sermitsiaq.AG-p tamanna paasivaa, innuttaasuniillu arlalinnit ilisimatinneqarluni nassiussarsiat tiguneqartussaagaluit, suliumajunnaartoqarnerani aaneqarsinnaanngikkallartut.
RAL-imi qullersat Ilulissiarput
Ingerlatsinermi pisortaq (operationschef) COO, Ivalu Kleist uppernarsaavoq isumaqatigiinngitsoqarsimasoq, sunarpiarli isumaqatigiinngissutaasimanersoq oqaatigiumanagu.
- Uppernarsarsinnaavara isumaqatigiinngitsoqarnera pissutigalugu sulisut ilaat suliartorsimanngitsut. Aamma uppernarsarsinnaavara unammillernartut qaangerniarlugit iliuuseqarneq aallartereeratsigu. Suliamut tunngatillugu maanna annerusumik oqaaseqarsinnaanngilanga, Ivalu Kleist, Royal Arctic Linemi COO Sermitsiaq.AG-mut ilisimatitsivoq.
RAL-imi qullersat isumaqatigiinngitsoqarnerani aaqqiiartorlutik Ilulissanut kingusinnerpaamik aqagu tikissapput.