Ilulissat: Akunnittarfik pisortamik atorfinititsivoq
78-inik ineeraqartussaq Hotel Ilulissat aappaagu ammassaaq. Akunnittarfimmi pisortassamik atorfinititsisoqarpoq.
Hotel Ilulissat aappaagu upernaami ammassaaq, tassanilu Karl Sandgreen, illoqarfimmiut ilisarisimanerusaattut taajuuteqartoq Aakattak, akunnittarfimmi pisortassatut atorfinitsinneqarpoq.
- Karl Sandgreenip akunnittarfinni takornariaqarnerullu iluani ilisimasaqarluarnera, kiisalu nuna tamakkerlugu pingaarnertullu Ilulissani ataatsimiittarfinnik ingerlatsinerit (konferencer) tungaatigut ilisimasaqarluarnera peqqutaalluni qinerneqarpoq, tusagassiutinut nalunaaruteqartoqarpoq.
Akunnittarfik 78-inik initaqassaaq, arlalinnik minnerumaanik ataatsimiittarfeqarlunilu neriniartarfeqassaaq. Ineeqqat ilaat marluk ineerarujussuussapput tamarmik immikkut 50 kvadratmeteriussapput.
- Suliassai pingaarnerit tassaajumaarput nunarsuarmi hotelinik suliniaqatigiiffissuit (hotelkæde) nunatsinni siullerpaap aallartisarnissaa, sulisoqarnermut najoqqutassiat nutaat atuutsilernissai taavalu takornarissat akimanerusut qammarnissai. Ukiuunerani suliassat pingaarnerit ilagilluinnassavaat ataatsimiittarfinnik ingerlatsinerit (konferencer) annertuumik ingerlatissallugit, tassanilu aamma Karl-ip pisisartussat nassaariniassavai, ilisimatitsissutigineqarpoq.
Ilulissani inuussutissarsiortut, Frank aamma Tommy Bagger, kiisalu Polar Seafoodinit Jens Salling, akunnittarfiliortuupput.