nunaminertanik akuersissutit
Inuussutissarsiorfissatut nunaminertat Sermersuup utertippai
Kommuneqarfiit pingaarnersaasa nunaminertat akuersissutigineqarsimasuni, atorneqarsimanngitsut piffissaliussamiluunniit atorneqarsimanngitsut massakkut utertinnialerpai.
Tamatumunnga pissutaavoq kommuni inuussutissarsiorfissatut nunaminertanik amigaateqarnera.
Utaqqisorpassuit
- Inuussutissarsiorniarlutik sanaartorfissaaleqisulli utaqqisuutigisagut amerlapput. Amerlasuut suliniuteqarput aningaasarivinniillu akuersissummik pissarsereersimalluni, taamaattoq sanaartorfigisinnaasaannik tunisinnaannginnatsigit aallartissinnaanngitsut, Sanarfinermut Avatagiisinullu pisortaq, Hans Henrik Winther Johannsen, Sermitsiaq.AG-mut paasissutissiivoq.
Taanna sapaatit-akunneri tamaasa ingammik suliffeqarfeeqqanit, attartortuusunerusut, nunaminertamik piukkunnartunik apeqquteqarfigineqartarpoq.
- Massakkut sulissutigilerparput nunaminertat akuersissutigineqarsimasut atorneqarsimanngitsulli utertinniarneqarnerat, Hans Henrik Winther Johannsen oqarpoq.
20.000 kvadratmeterit
Taanna naliliivoq, Nuummi inuussutissarsiorfissatut nunaminertat 20-t missaani pineqartut, 20.000 kvadratmeterinillu annertussusillit.
Taassuma takusinnaavaa nunaminertat akuersissutaasimasut atorfissaraluinut atornagit toqqorsivittut atorneqaannartartut.
- Inuussutissarsiornermillu ingerlatallit pisariaqartitsivissut pillugit sumiiffiit taakku torersartinnialerpagut, pisortaq oqarpoq.