Narsaq
Ipiutaq guest farm tuniniarneqartoq
Aappariit aallarniisut Agathe Devismep aamma Kalista Poulsenip nunaatertik 3,5 millionit koruunilersissallugu neriuutigaat
Suliffeqarfiutip aallarniisutut nalinga aningaasanngorlugu naatsorsornissaa ajornaatsuinnaaneq ajorpoq. Tassami isumassarsiaq, nioqqutinik ineriartortitsineq aamma sulinermi akunnerit atukkat qanoq nalilersorneqartarpat?
Tuniniaanermi aki: 3,5 millionit koruunit
Kisianni aappariit aallarniisut Agathe Devisme aamma Kalista Poulsen, akunnittarfiutertik Ipiutaq guest farm, Narsap eqqaaniittoq akimik aalajangerput.
Aappariit akunnittarfik tuniniarniarlugu juunimi aalajangerput, maannalu illu suliffeqarfimmilu pigisat tamaasa, nunalerinermut aamma takornariaqarnermut tunngasut tamaasa, 3.485.000 koruunilerlugit tuninialerpaat.
Nersornaaserneqarnikoq
Ipiutaq guest farm najukkameersunik nerisassianik nioqquteqarnerminut nersorneqarnikuuvoq. Suliffeqarfillu aamma Brugsenip 2013-imi akissarsititsinerani pissarsisuuvoq. Akissarsititsissut ilaatigut akunnittarfimmut tassunga aamma Hotel Arcticimut tunniunneqarnikuuvoq.