suliffissat
Kalaallit Nunaat nakorsanik amigaateqarpoq
Nakorsat peqqissaasullu Islandermiut Savalimmiormiullu Kalaallit Nunaanni sulisinnaanissaat Doris Jakobsenimit (S) neriuutigineqarpoq
Illoqarfiit nunaqarfiillu amerlasuut peqqissaasunik ilinniarsimasunik amigaateqarput.
Nunat Avannarliit Killiit Siunnersuisoqatigiiffiata ataatsimeersuarnerani tamanna eqqartorneqartunut ilaavoq, periarfissarlu atorluarneqarnissaa 2013-mi siunnersuutigineqarluni.
Ajornartorsiutaavoq
Siunnersuutigineqarsimasoq Doris Jakobsenip Nunat Avannarliit Killiit Siunnersuisoqatigiiffiata ataatsimeersuarnerani qaqilerpaa.
Kalaallit Nunaanni peqqissaasunik amigaateqartoqarnera pillugu oqalugiaateqarpoq pingasunngormat.
- Kalaallit Nunaat ullumikkut ima inissisimavoq nakorsat tikisinnissaat, ajornakusoortorujussuulluni, taamaammat ajornartorsiut taanna maannakkorpiaq atuuppoq, Doris Jakobsenip Nunat Avannarliit Killiit Siunnersuisooqatigiiffianut naqissusserpaa.
Isumaqatigiissut malinneqanngitsoq
Naak Kalaallit Nunaata Islandip napparsimmavissua Landspitali suleqatigiinnissamik isumaqatigiissuteqarfigereeraluaraa manna tikillugu suli katsorsartinnissanik neqerooruteqartoqanngitsoq Doris Jakobsenip eqqaavaa. Naalakkersuisulli neriuutigaa katsorsartittarnissamut periarfissat ungasippallaanngitsukkut piviusunngortinneqarumaartut.
-Siunertaavoq peqqissaanermi neqeroorutit amerlisarnissaat, nunaqarfinni illoqarfinnilu ilinniarsimasunik amigaateqarnermi unammilligassaqarmat. Assersuutitut toqujartortunut neqerooruteqarsinnaaneq nunaqarfinni, Doris Jakobsen tikkuaavoq.