attaveqaqatigiinneq
Kangaamiut Kangerlussuullu nutaanik umiarsualiveqalernissaat pisariaqartinneqarpoq
Umiarsualivissat 60 millionit koruuninik akeqassangatinneqarput. Namminersorlutik Oqartussat aningaasaleeqataanissamut piumassuseqasappata, Qeqqata kommuniata sanaartornerit akisussaaffigiumallugit neqeroorutigai
Qeqqata Kommunialu Kangaamiuni Kangerlussuarmilu talittarfiliortoqarnissaanut aningaasaleeqataanissamut ammavoq, aningaasaqarnermullu ataatsimiititaliami ilaasortat tamarmiusut borgmesteri Malik Berthelsen Naalakkersuisunut Kangaamiuni Kangerlussuarmilu talittarfiliortoqarnissaanut isumaqatigiinniarsinnaatillugu pisinnaatitaaffilerpaat.
Umiarsualiviit pingaarutillit
– Talittarfiit aalisarnikkut takornariaqarnikkullu pingaarutilimmik inissisimasuummata neriuppugut Namminersorlutik Oqartussat aamma talittarfeqarnikkut ineriartortitsinissaminnut piumassuseqassasut, borgmesteri Malik Berthelsen mailikkut allappoq.
Kangerlussuarmi umiarsualiviliornissamut aqqusinniornissamullu pilersaarutip avatangiisinut sunniutissaanut naliliinerup nassuiaataa maanna decemberip tallimaata tungaanut tusarniaassutigineqaleruttorpoq. Kangaamiunilu talittarfiliornissamut kissaatigineqartoq ilanngukkaanni talittarfiliornermi aningaasartuutissat katillugit 60 millionit koruuniupput.
– Kangerlussuarmi talittarfimmut 45 million koruunit Kangaamiunilu 15 million koruunit Namminersorlutik Oqartussat aningaasaliisinnaappata, sanaartornertaa uagut nammineq akisussaaffigisinnaagipput neqeroorutigaarput, borgmesteri Malik Berthelsen nassuiaavoq
Umiarsualiviit talittarfiillu
Kommuninut, Nunaqarfinnut, Isorliunerusunut, Attaveqaqatigiinnermut Ineqarnermullu Naalakkersuisup aningaasanut inatsisissamut 2018imut ukiunullu aggersunut missingersuusiatut siunnersuummut ukiumut 27,7 millionit koruunit umiarsualivinnut talittarfinnullu aningaasanik immikkoortitsivoq.
Allaaserisaq tamakkerlugu Sermitsiaq aviisimi atuaruk, aviisi digitaliusoq uani pisiarisinnaavat: