Kangerlussuarmi ataatsimiittoqarnerani Naalakkersuisut takkutinngillat

Ippassaq ataasinngornermi unnukkut Kangerlussuup Mittarfiata siunissaa pillugu, Qeqqata Kommunia innuttaasunik ataatsimiititsivoq.

Naalakkersuisut timmisartoqarfinnut pilersaarutaat pillugit kamaatigisatik avitseqatigiissutiginiarlugit amerlasuut takkupput, tassami nunaqarfimmi mittarfik Avannaani aamma Kujataani takinerusunik mittarfeqalernissaannik kissaatigineqarneratigut qaangerneqalermat.

Naalakkersuisut sinnerlugit aallartitanik ataatsimiinnermi peqataasoqanngilaq.

Naalakkersuisunik oqaloqatiginninnissamik piumasaqartut
Attaveqarnermullu naalakkersuisoq Knud Kristiansen (A) taassumalu atorfilittai innuttaasunik ataatsimiititsinermi peqataasinnaanatik nalunaaruteqarput, peqataasinnaanani nalunaarneq innuttaasunit saqqummiisunut apeqqutissalippassuarnit pitsaasumik tiguneqanngilaq.

- Kangerlussuarmi tulliani innuttaasunik ataatsimiittoqarnissaanut innuttaasut Naalakkersuisoq takussallugu tusarfigissallugulu qilanaarivaat, qeqqani kommuunip borgmestereqarfianit tusagassiuutinut nalunaarut taama oqaasertaqarpoq.

Innuttaasunit soqutiginninneq annertuvoq, Kangerlussuarmi innuttaasunit 500-sunit 100-ngajaat ornigupput.

Suliamik ilisimasallit amerlasuut peqataapput
Qeqqata Kommunia, Air Greenland, Mittarfeqarfiit aamma ARTEK/DTU peqatigalugit ulluunerani Kalaallit Nunaani timmisartuussisarneq aammalu Kangerlussuaq pillugu Inatsisartut sanaartornermut ataatsimiititaliaat paasissutissiissuteqarfigaat.

Taamaaleriarlutik Inatsisartut sanaartornermut ataatsimiititaliaat Nuummut uterlutik aallareernerisa kingorna, Mittarfeqarfiit aamma Air Greenland-ip pisortaaneri, ARTEK-ip nunamut qeriuaannartumut ilisimatuua aammalu Qeqqata Kommuniata borgmesteria Kangerlussuarmiiginnarput innutaasunillu ataatsimiititsillutik.

Nuna qeriuaannartoq pillugu isumaqatigiinnginneq
Qeqqata Kommuniata ataatsimiinnermut peqataatitai naapertorlugit, sinerissami mittarfiit 1800 meteritut aamma 2200 meteritut takissusillit mittarfinnut akulikitsumik mittarneq ajoqusissagaat aammalu mittarfiit taamatut takissusillit nassatanik assartuinermut inissaqartitsinngitsut Air Greenlandip oqaluttuaraa.

Taakkua aamma ilisimatitsipput, Mittarfeqarfiit paasissutissiissutigaat, Naalakkersuisoqarfimmit qinnuigineqarnikkut, iluarsartuussinissaq ullutsinnut naapertuuttoq qanoq akeqarnissaa sukkasuumik misissuiffigisimallugu.

Kangerlussuarmi nunap qeriuaannartumik ajornartorsiuteqartoqanngilaq
Taakkulu iluarsartuussinerit pillugit Naalakkersuisut 2 milliardit koruuninik immaqa assersuutigalugu kisitsisinik saqqummiussaqarput.

Kommuunip aamma sulisuisa oqaatigaat, ARTEK/DTU-p paasissutissiissutigigaa, nunap qeriuaannartumut mittarfik Amerikamiut qulakkeereersimagaat, ataatsimullu isigalugu nunap qeriuaannartup aakkiartorneranik ajornartorsiuteqanngitsoq.

Asfalt nutaanngitsoq akisussasoq
Mittarfimmili kimmut 250 meterit kingulliit nikittoornermik ajoquteqalersimavoq, asfalti atuuttoq 1987-iminngaanneerami pissutaalluni.

Ilisimatuut peqataasut tamarmik isumaqatigiissutigaat, mittarfik nutaamik qalliutitaartariaqartoq, atuussinnaanera ukiunut 20-25-nut naatsorsuussaammat.

Maannakkut ukiut 30-t ingerlareerput nutaamillu qalliusiinissaq pisariaqarpoq. Tassa taamaalilluni, Namminersornerullutik Oqartussat Kangerlussuaq 1992-imi tigummatigulli mittarfimmi nutaamik asfalterisoqarnikuunngilaq.

Kangerlussuarmut neriuutit annertuut
Naalakkersuisut timmisartoqarfinnut pilersaarutaat Qeqqata Kommuniani kamaatigineqarneranut, piffimmi pitsaasunik inuussutissarsiornikkut suliniuteqartoqarneranik ilaatigut peqquteqarpoq.

Ippassaq ataatsimiititsinermi Qeqqata Kommuniani borgmesteri, Hermann Berthelsen (S), Kangerlussuarmi inuutissarsiutitigut sulianiuterpassuit pillugit oqaluttuarpoq, ilaatigut Air Icelandip aasamut Kangerlussuarmut timmisartuussisalernissaa aammalu Kangerlussuup Sisimiullu akornanni ATV-nut aqqutissaq, kommuunip sanassallugu aalajangiussimasaa, biilinut misileraavissaq pilersaarutaasoq aammalu umiarsualivissatut nutaatut pilersaarutaasoq pillugit oqaluttuarpoq.

Tassani kommuunimi Naalakkersuisut mittarferujussuup siunissaa qulakkernianngimmassuk tupigusuutigineqarpoq, allami mittarfiit nutaat pilersinneqarneritigut nunaqarfiup eqqaani suliniutit maangaannartissappatigit ernumassutigigamikku.

Mittarfiit amerikamiunik suliarineqartut
Innuttaasunik ataatsimiititsinermi Hermann Berthelsenip, sorsunnersuup aappaata ingerlanerani amerikamiunit mittarfiit sanaartorneqarsimasut, nunat eqqaamiutta suli atormatigit ineriartortillugillu tupigusuutigalugu oqaatigaa.

Nunavumi Iqalunni mittarfik suli atorneqarpoq, Islandimi Keflavimmi mittarfik suli atorneqarpoq Savalimmiunilu Vagarimi mittarfik suli atorneqarluni. Illuatungaatigulli amerikamiut mittarfii silap pitsaassusaanik qulakkeerinnittut Nunatsinni Naalakkersuisunit atorunnaarusunneqarput.

Ataasinngornermi innuttaasunik ataatsimiititsinermit assilisat uuma allaaserisap ataani takuneqarsinnaapput