Royal Arctic Line
Kiisami: Containerinik kukkuluttuuteqarneq annikillisinneqarpoq
Royal Arctic Linep containerit Aalborgip umiarsualivianit Atlantikup imartaatigut umiarsuarnit usineqartut suliarineri iluarsiivigiartorpasilerpai.
Umiarsuaateqarfik it-systemimik nutaamik atuilernermini upernaarli ajornartorsiorfigilerpaa, tamannalu umiarsuaateqarfiup atuisuinut, minnerunngitsumillu nunatsinni pisiniarfiit niuertut kaaviaartitaannut akeqartitsivoq.
Aamma atuaruk: Royal Arctic Linemi continerit 88-it kukkussutigineqartut
Sapaatip-akunnerini 26, 27 aamma 28-imi containerit 101-it usilersorneqanngillat imaluunniit usingiarneqanngillat, containerillu qulit umiarsuarmut usiliunneqarput, naak taamaattussaanngikkaluartoq.
Sapaatip-akunnerani 29-mi umiarsuaatileqatigiiffiup unammilligassat ilungersuutigisimasaanut iluatsitsiffiorpasippoq. Containerit ''taamaallaat'' tallimat usilersorneqartussaagaluartut usilersorneqarsimanngillat. Tassani containerit sisamat Nuummi aamma Paamiuni ataaseq pineqarput.
Kukkunernut procenti appasinnerpaaq
Sapaatip-akunneranut pitsaassutsimut uuttortaaneq, umiarsuaatileqatigiiffiup sakkortuumik isornartorsiorneqarnerup kingorna saqqummiunniarlugu aalajangiussaata takutippaa, sapaatip-akunnerani 29-mi kukkunernut procenti 0,5-iusoq. Sapaatip-akunnerini siuliini tamanna 2,3-p aamma 6,1-ip akornanni nikeraraluarpoq.
Aamma atuaruk: Royal Arctic Line ajutoornernik nangitittoq
Pitsaassutimut uuttuinerit saqqummiunneqarnerinut atatillugu umiarsuaatileqatigiiffiup maluginiarpaa, anguniakkap angunissaanut suli ''aqqutissaqartoq''.
- Suleriaatsilli pissusissamisut ingerlalernissaannut suli aqqutissaqarpoq. Royal Arctic Linep pitsaassutsimik uuttortaanini sapaatit akunnerini tulliuttuni ingerlatiinnassavaa, Royal Arctic Line allappoq.
Aamma atuaruk: Sulisitsisut Royal Arctic Linemut sakkortuumik isornartorsiuisut