KNAPK sinerissamut qanittumi aalisarneq pillugu iliuusissatut pilersaarusioqqusisoq
Aalisartut Kattuffiata KNAPK-p paasisinnaalluarpaa, Grønlandsbankenip kalaallit umiatsiaararsorlutik aalisartut aningaasaliiffigineqartarnerat unitsimmagu
KNAPK-mi pisortap Tønnes Berthelsenip Grønlandsbankenip aningaasatigut tapeeqqikkusunnginnera uggoraa, paasisinnaalluarpaali aningaasariviup sooq taama qisuariarnera.
- KNAPK Grønlandsbankenisulli isumaqarpoq, umiatsiaararsorluni aalisarnissamut akuersissutit amerlavallaat tunniunneqarsimapput. Tamatumami malitsigisaanik kikkut tamarmik naammattumik aalisagartassaarutissapput, taamalu aamma aalisartorpassuit aningaasatigut ilungersulissallutik, Tønnes Berthelsen Sermitsiaq.AG-mut oqarpoq.
FN-p anguniagaanut akerliusoq
Tønnes Berthelsenip aamma oqaatigaa, sinerissamut qanittumi ilaatigut qaleralittassiissutit biologit inassuteqaataannit amerlanerujussuusarneranni nungusaataanngitsumik aalisartoqanngitsoq.
- Tupinnanngilaq FN-ip aalisarnermi nungusaataanngitsumik ingerlatsisoqarnissaanik anguniagaanut akerliususumut Grønlandsbanken aningaasaliissuteqartarnerminik unitsitsimmat, KNAPK-mi pisortaq erseqqissaavoq.
Taanna isumaqarpoq, sineriammut qanittumi aalisariutit taarsersornissaat aningaasassaqartinniarlugit Naalakkersuisut aalisarnermik inuussutissarsiuteqartunut tapiissuteqarnerusariaqartut.
Aningaasanut inatsimmi konto atuutsinneqalerli
- Avataasiortut nutaaliarsuarnik kilisaateqarput, aalisariutilli mikinerit nungullarluinnarsimapput. Aalisarnermi isumalluutinut akitsuutit, ingerlatseqatigiiffiit inuillu akileraarutaat 1,6 milliarder koruuninik isaatitsiffiusarput. Akerlianik siunnersortinik atorfinitsitsinikkut aamma ajunaarnersuaqarnerani aningaasaateqarfik aqqutigalugu aalisarnermut taamaallaat 4,2 millioner koruunit aningaasaliissutigineqartarput, Tønnes Berthelsen ilisimatitsivoq.
- Aalisarneq Grønlandsbankenimit maanna aningaasaliiffigineqassaarmat, Polar Seafood, Royal Greenland Banknordikilu kisimik aningaasaliissuteqarsinnaanngorput. Taamaammat kissaatigaarput, Naalakkersuisut aningaasanut inatsimmi immikkut kontomik 14 millioner koruuninik aningaasartalimmik atuutsitsilissasut, aningaasat aalisarnerup ineriartortinneqarneranut atugassat, KNAPK-mi pisortaq Naalakkersuisut iliuusissatut pilersaarusiornissaannik ujartuisoq taamatut kissaateqarpoq.
Akerlilerneqanngitsoq
- Grønlandsbankenip aalajangernera akerlileruminaappoq. Aningaaseriviummi taamatut ineriartortoqarnera ukiorpassuarni mianersoqqutigisarsimavaa, Tønnes Berthelsen oqarpoq.
Læs hele sagen:
-
Aningaaseriviup umiatsiaararsorlutik aalisartunut aningaasaliinini tamaasa unitsippai
-
Politikkikkut siunnerfik nutaaq pisariaqarpoq
-
Jollefiskerne kommer på udvalgsdagsorden
-
Umiatsiaararsorlutik aalisartut ataatsimiititaliami oqaluuserineqartussanngortut
-
Banknordik umiatsiaararsorlutik aalisartunut ikiuisarnerminik ingerlatsiinnarniartoq
-
Aningaaseriviup aalisarneq pimoorunneqartoq erseqqissaatigaa
-
Maanna iliuuseqartoqassaaq
-
Naalakkersuisut umiatsiaararsorlutik aalisartut aningaasatigut ikiorserniarpaat?
-
Krusep Grønlandsbanken kamaakkaa