KNI-mi pisortaaneq: Inuussutissat akii sorsuttoqarneranit sunnerneqassapput
Ukrainemi sorsuttoqarnerata kinguneranik Europami niuerfinni uuliap akia qaffakkiartupilooraluartoq, KNI-p ikummatissanut akigititani taamaaginnartissinnaavai. Inuussutissanulli akigitinneqartut sorsuttoqarnerani allanngortoqanngippat qaffangaatsiarsinnaapput.
Nunarsuarmiut tamarmik pissangapput.
EU-mit USA-millu Ruslandimit uuliamik tikisitsisarnerup inerteqqutaalernissaa aarlerisaarutigineqarpoq, Ruslandilu akissuteqarluni Europami nunanut gassimik pisariaqartitsisunut 40 procentimik pilersuisarneq matuniarlugu aarlerisaarivoq. Tamatuma malitsigisaanik EU-mi uuliamut akigitinneqartut qaffarssimapput.
- Niuertarfitsinni maannakkorpiaq pisoqaqaaq, KNI-mi pisortaaneq Jeppe Jensern Sermitsiaq.AG-mut oqarpoq.
Nunamili maani ikummatissamut akigitinneqartut eqqarsaatigalugit eqqissisaavoq.
- Ikummatissanut akigititavut allangnorarpallaannginnissaa akigitallu patajaattuunissaat piffissamut sivisuumut qulakkeertarpavut.
Akigitat qanoq sivisutigisumik allanngortinneqassannginnersut oqaatigisinnaanngikkaa
Jeppe Jensenip nunatsinni akigititat qanoq sivisutigisumik allanngortinneqassannginnersut itisiliilluni oqaatigerusunngilaa, erseqqissaassutigaali Ukrainemi sorsuttoqarnera pissutigalugu akigitinneqartut piffissami qanittumik allanngunngaatsiarsinnaasut.
- Akit allanngunnginnissaanik qulakkeerinnissimanerput qanoq sivisutigissanersoq oqaatigisinnaanngilara, nunarsuarmili niuerfinni akit maannakkut qaffakkiartornerat malugissaqqaarparput.
Nunarsuarmi niuerfinni akigititat qaffasissut piffissami sivisuumi ingerlaannassappata ikummatissanut maanna akigititatsinnut sunniuteqarsinnaapput.
Inuussutissanut akigititat sunnerneqassasut
Uuliamut akigititap piffissami sivisunerusumi allanngortinneqannginnissaa qulakkeerneqarsimagaluartoq, Ruslandip Ukrainemut saassussineranut atatillugu inuussutissanut akigititat qaffangaatsiarsimapput.
- Ulluinnarni nioqqutissaativut nunarsuarmi sumiiffinnit assinngitsunit pisiarisarpavut, nunarsuarmilu niuerfiit akititaat malillugit soorunami akiliisarluta. Ukiuunerani peqqumaatissat siorna ukiakkulli isumannaarsimavagut. Nunarsuarmi niuerfiit akigititaat qaffanneqaraangata Pilersuisumi akigititat ingerlaavartumik naleqqussarneqartassapput, pisortaaneq ilisimatitsivoq.
Nioqqutissanut aalajangersimasunut akigititat nunarsuarmi niuerfinni sapaatip-akunnerini kingullerni 5-6 procentimik qaffassimapput.
- Nioqqutissat Ruslandimeersut akiisa qaffannerat qanorpiaq kinguneqassanersut suli naluarput, nunarsuarmili niuerfiit akigititaminnik qaffaasarnerat soorunami malissavarput.
Assartuinermi akigititat aamma sunniuteqartartut
Akigitat qaffannerisa saniatigut assartuisarneq aamma sunniuteqartussaavoq, pisortaaneq erseqqissaavoq.
- Assartuinermi aningaasartuutit qaffassappata atuisunit aamma malugineqartussaapput.
RAL-ip assartueqatigisartagaata EIMSKIP-ip sapaatip-akunnerani matumani nalunaarutigaa, uuliamut tapiliussatut pineqartartoq martsip 14-ianiit qaffanneqassasoq, RAL-ili Sermitsiaq.AHG-mit arlaleriarluni pissutsit pillugit apersorneqarusuttaraluarluni apersorneqarusussimanngilaq.
- Pisumut atatillugu maannakkorpiaq oqaaseqaatissaqanngilagut, RAL-imit akissutigineqarpoq.