KNI miliuuninik pingasunik kisitsisitalinnik sinneqartooruteqartoq
Suliffeqarfissuaq KNI 2019/20-mi akileraarutit suli peernagit 113,3 millioner koruuninik sinneqartoorsimavoq, ukiup siuliani ukiumoortumik naatsorsuutinit 5,6 millioner koruuninik ikinnerusunik.
Psiortaanerup Peter Grønvold Samuelsenip tusagassiorfinnut nalunaaruteqarnermi erseqqissaatigaa, naatsorsuutini 1.139,2 millioner koruuninik nammineq aningaasaateqarnerup ”takutikkaa KNI suliffeqarfiusoq aningaasatigut patajaatsumik inissisimasoq”.
Suliffeqarfissuup illuuterpassuani aserffallatsaaligassat ikilisarniarneri ukiuni kingullerni sorsuutigisimavai, naatsorsuutinilu saqqummiunneqaqqammersuni takuneqarsinnaavoq, sanaartukkanut nutaanut aserfallatsaaliinermullu 142 millioner koruunit atorneqarsimasut, aamma 150 millioner koruunit ukioq manna taamatut atorneqarnissaannut immikkoortinneqarsimasut.
Tunngavik pingaaruteqarluinnartoq
- Suliffeqarfissuup aningaasarsissaarnissaa pingaaruteqarluinnarpoq sanaartukkat pisoqalisut aserfallatsaaliortuarneqarnissaannut akissaqassagaanni; tamannalu Pilersuisoq Polaroil-iluunniit eqqarsaatigalugit atuuppoq, pisortaaneq erseqqissaavoq.
KNI-p iluanaarutiminit 20 millioner koruunit Nunatta Karsianut tunniussimavai, suliffeqarfissuullu ilisimatitsissutigaa, inummut akileraarutinit 85 milloner koruunik aamma ingerlatseqatigiiffiup akileraarutaanit 24,5 millioner koruuninik inuiaqatigiinnut tapissuteqarsimallutik. Akerlianik Nunatta Karsianit tapiissutigineqartartut ukiut pingasut kingulliit ingerlaneranni affaannanngortinneqarsimapput, naatsorsuutini saqqummiunneqarsimasuni maanna 18 millioner koruuniulersimasut takuneqarsinnaavoq.