KNI niuertunik 12-nik ilinniakkamik naammassititaqarput
KNI A/S-ip ilinniarfiani 'Niuertunngorniarneq'-mi niuertunngorniat ilinniakkaminnik naammassinninnerminni sapaatiummat allagartartaarput.
Niuertunngortut 12-it ilinniarnertik ukiormanna apriilip 21-anni aallartippoq, taamaalillutillu maannamut pingasoriarlutik Sisimiuni KNI-ip Kiffartuussivianut ilinniarnermik atugarsornertaa ingerlakkiartoreersimallugu. KNI tusagassiuutinut nalunaarummi taama ilisimatitsivoq.
Niuertunngorniat soraarummeereerlutik unnukkut nereqatigiinneranni KNI-p pisortaanera Peter Grønvold Samuelsen ilaatigut ima oqaaseqarpoq:
Siunnerfimmik piviusunngortitsissasut
- KNI nutaaliaasoq – pisisartuminik qitiutitsisoq – pikkorissunik piginnaaneqqortuunillu sulisoqartoq pilersikkusupparput. Taamatut siunnerfeqarnitta anguniarnerani ilissiuvoq kivitseqataasussat. Ilissiuvoq aqutsilluarnissigut sulisunillu siulersuilluarnissigut suleqatissi piginnaasaannik eqqortumik atuisitsinikkut angusassinnik pitsanngorsaaqataasussat. Ilissiuvoq KNI-p siunissaanik qaamanerulersitseqataasussat.
Niuertunngortut allagartartaartinneqarnermik saniatigut igaffimmi savinnik tunineqarput, saqqarmiortaartinneqarlutik qaammammusiaallu 1.500 koruuninik ilaneqartut ilisimatitsissutigineqarpoq.
Tamarmik angusisoq
Niuertunngorniarneq aggustimi 2016-ip aallartinnerata kingorna maannamut atuaqatigiiaat aqqaneq-marlukkaat sisamat taamaalillutik ilinniartitaaneq pingasunik immikkoortortalik naammassivaat, ikerinnakkut unittoqaratik, tamarmillu angusillutik.
Niuertunngorniarnermi sulisut 48-it taamaalillutik Niuertutut allagartartaartinneqarput.