KNR nukittorsarpoq
KNR-imi attaveqaqatigiinnermut pisortanngorlaaq suliffimmini qaffatsinneqartoq
Masaana Egede radiomi pisortatut atorfinitsinneqarpoq. KNR-imit nalunaarutigineqarpoq ukioq 2015 radiop ukiorissagaa
29-nik ukioqartoq Masaana Egede KNR-imi attaveqaqatigiinnermut siullerpaalluni pisortanngortinneqartoq, radiomi pisortassatut toqqarneqarpoq.
KNR tusagassiutinut nalunaaruteqarpoq.
Radioqarfimmi paarlaassuisoqarneratigut taamatut inissiisoqarpoq. Nuummi radio ’Voice of Greenland’, KNR-imi ussassaarisumit Claus Nissenimit pigineqartoq, KNR-imit pisiarineqarsimasoq Sermitsiaq.AG-mit allaaserineqartareerpoq. Inuusuttut radiomi tusarnaarnerusalernissaat anguniarlugu pisiarineqarluni.
- KNR radio tassaavoq taamaattuassallunilu uagut kulturimik kanalerput nr. 1, uagullu tamanna tulluusimaarutigaarput, ukiorlu 2015 uagut ilutsinni toqqarparput radiop ukiorissagaa, KNR-imi pisortaq Søren Lennert Mortensen nassuiaavoq.
Radiomi pisortaasimasoq Henriette Rasmussen siunissami kulturimik aaqqissuisutut atorfik nutaaq atorfigilissavaa, tassani ilaatigut KNR-ip kulturimut aningaasartuutai akisussaaffigilissallugit tamatumuunalu ilutigalugu kulturimik tv-kkut radiokkullu aallakaatitassiortalissalluni.
Naalaartartunik isiginnaartartunillu misissuisitsinerup kingulliup takutippaa, radiomik atuisut amerliartuinnartuusut, naalaartartullu 77 procentiisa radiomi aallakaatinneqartartunik iluarisimaarinnittuusut.