Kujataani timmisartoqarfiliorneq immikkut akiligassanik nassataqassasoq
Qaqortumi timmisartoqarfiliorneq Nunatta Karsianut millionerpassuanik naleqarsinnaavoq, tassa timmisartoqarfissap qanoq isikkoqarnissaanik pilersaarutaasut annikillisinneqanngippata.
Politikkertit timmisartoqarfiliassat pillugit 2018-imi aalajangermata aningaasanik tunniussisoqarpoq, aammali oqaasertaliunneqarluni kujataani timmisartoqarfiliorneq nammineq tamakkiisumik aningaasaliiffigineqassasoq.
- Qaqortumi timmisartoqarfiliornissamut aningaasanik taarsigassarsisoqassanngilaq, isumaliutissiissummi taamatut allassimasoqarpoq, tassani Namminersorlutik Oqartussat peqqusisimapput timmisartoqarfissanut pingasuusunut anigaasaliissutissat tamarmiusut 2,1 milliarder koruuniussasut.
Aningaasat annertussusaat isertuunneqartoq
Kalaallit Aiports Domistic Qaqortumi timmisartoqarfissamut atatillugu aningaasanik qanoq annertutigisunik atugassinneqarsimanersoq isertuussaavoq. Isertuussinermut pissutaatinneqarluni, sanasut suliaqarnissamut neqerooruteqarsimasut timmisartuutileqatigiiffiup killiliussaanik ilisimasaqarnermikkut iluaqutissarsiniarsinnaanerat.
Mittarfiliornissamut atatillugu neqeroortitsinermi siullermi mittarfinnik ingerlatseqatigiiffiup missingersuutai sinningaatsiarlugit neqerooruteqartoqarsimavoq, taamaammallu nutaamik neqeroortitsisoqartariaqarsimavoq, neqeroortitsisoqaqqimmalli suliassamut piumasaqaatit allanngortinneqarsimanngillat.
- Neqeroorutigineqartut siulliit missingersuutinit annertunerusimapput. Piginnittuvut Namminersorlutik Oqartussat peqatigalugit aalajangersimavugut piumasaqaatit allanngortinnagit nutaamik neqeroortitsissalluta, Kalaallit Airports Domistic A/S-imi pisortaq Jensa Lauridsen ilisimatitsivoq.
Missingersuutitigut killiliussat sinnerneqassasut
- Neqeroortitsinerup nutaap missingersuutitta iluaniinnissaanik isumaqartoqassappat tamanna sianiinaarnerussaaq. Aap Qaqortumi timmisartoqarfiliornermi missingersuutivut qaangerneqassanngippata tupaallaatigissaqaara, pisortaq neqeroortitsinermi millioninik marlunnik pingasunilluunniit kisitsisitalinnik qaanngisoqassappat qanoq annertugisinissaanik eqqoriaarusunngitsoq erseqqissaavoq.
Timmisartoqarfiliorneq aallartinneqassappat taamaalilluni periarfissat pingasunngorput:
Politikerit ingerlatseqatigiiffimmut amerlanerusunik aningaasaliisoqarnissaanik aalajangernissaat
Suliassap akikinnerulersillugu annikillisinneqarnissaa
Imaluunniit periarfissat marluk siuliani pineqartut ataatsimoortinneqarnissaat
Kalaallit Airports Domestic piffissamik atorluaaniarluni allamik pilersaarusioreersimavoq aamma qanoq sipaaruteqartoqarsinnaaneranik allattuereersimavoq. Jens Lauridsenip ilaatigut oqaatigaa, sipaarutaasinnaasut ilagingaat timmisartoqarfiup illutassaa aamma atortut timmisartoqarfimmit atorneqartussat.
Piffissamik eqquinerluttoq
Immikkut akiligassaqarsinnaaneq coronap tuniluunnerata malitsigisaanik ikiosrsiissutigineqartunut Nunatta Karsiata annertuumik aningaasartuuteqarsimanerani piffissamik eqquinerlunneruvoq. Tamatuma saniatigut aalisarnermi akigititat apparsimapput, tamatuma kingunranik Nunatta Karsianut isertitassatut naatsorsuutigineqarsimasut, tassa qalerualinnut aalisakkanullu akitsuutitigut isertitarineqartussatut naatsorsuutigineqarsimasut annikillisinneqarsimallutik
Taamaammat kujataani timmisartoqarfissap illutassaanik mittarfissamillu sanaartornissamut neqeroortitsinerit marluk martsip aallaqqaataani aqqaneq-aappaanilu saqqummiunneqarpata qanoq inerneqarumaarnersut pissanganarpoq.