aatsitassarsiorneq
London Mining allanit aqunneqalerusuppoq
Aatsitassarsioqatigiiffik Tuluit Nunaanneersoq aningaasatigut annertuumik ajornartorsiortoq suliffeqarfimmit allamit aqunneqalerusuppoq
Aatsitassarsioqatigiiffik London Mining Nuup Kangerluani Isuani saviminermik piiaanissamut 2013-mi isumaqatigiissuteqartoq annertuumik aningaasatigut ajornartorsiorpoq.
London Mining annertuumik akiligassaqarpoq. Saviminissap nalinga kiisalu suliffeqarfiup piiaaffiani Sierra Leonemi ebolartoqarnera pissutaalluni suliffeqarfik ajornartorsiorpoq.
London Miningip pisortaanera Graeme Hossie tusagassiutinut nalunaarpoq, suliffeqarfiup aningaasatigut ajornartorsiornera pissutaalluni suliffeqarfimmit allamit aqunneralerusulluni. Marampami piiaaffik attatiinnarneqarnissaa kissaatigineqarpoq.
- Suliffeqarfimmik nassaarusuppugut aningaasaateqarfimmik aqutsisinnaasumik, Marampami piiaaffik attatiinnarusupparput. Sulili tamanna aalajangerneqanngilaq suli, Graeme Hossie oqarpoq.
Isukasiani piiaanissaq aallartissappat 13 milliardinik aningaasaliisoqarnissaa pisariaqartinneqartareerpoq, taakkulu saviminissarsiorfimmut atorneqassapput. Naalakkersuisullu atsioqatigiittoqareerneraniit aningaasaliisussarsiulernissaq aallartinneqarluni.
Tuluit tusagassiorfiisa qaammammi uani allaaseraat suliffeqarfik indiameersoq JSW London Mining pisiarerusukkaa. Tamanna JSW-imit ilumuunnginnerarneqartareerpoq, kisiannili suliffeqarfimmik pisinissamik eqqarsaateqarlutik oqaatigalugu, Politiken allappoq.