Lynge-Larsen: KNI-mi naatsorsuutitigut peqquserlunneq imatut ingerlasimavoq
It-programmimik immikkut ittumik ineriartortitsisoqarsimavoq, taamaalilluni KNI A/S-ip quersuarmiittuuterpassuisa nalingat allanngortinneqarsinnaalluni. Hans Peter Lynge-Larsenip, sassarniarluni aalajangersimasup, uani nassuiarpaa qullersat sinnerlugit naatsorsuutinik qanoq ililluni iluarsaasseqataasarsimalluni
Naatsorsuusiornermik ilisimannittariaqarpoq KNI-mi naatsorsuutitigut uukapaatitsineq qanoq ingerlasimanersoq paasissagaanni.
Aviisip Sermitsiap – pisimasoq paasiuminaakkaluartoq – Hans Peter Lynge-Larsen nassuiaasippaa qanoq ililluni tamatumunnga akulerussimanersoq, qanorlu ilillutik naatsorsuutitigut uukapaatitsineq ingerlatseqatigiiffiup kukkunersiuisuanut isertorsinnaasimaneritsik.
Hans Peter Lynge-Larsen oqaluttuarpoq:
Naatsorsuutit suliarineqassagaangata siullermik quersuup matusimanera qulakkeerneqassaaq, taamaalilluni nioqqutissat atuinermut attuumassutillit amerlanerusut, ingerlatsinermut sunniutillit, naatsorsuusiornermi ilanngunneqassanngimmata.
Quersuarmiittuutit allattorsimaffiat it-systemimit peerneqartarpoq, fil-imullu immikkoortumut toqqorneqarluni.
It-programmi immikkut ittoq ineriartortinneqarpoq
Quersuarmiittuutinut allattorsimaffik it-programmimut immikkut ittumut ikineqarpoq, taannalu 2014-imi sananeqarpoq naatsorsuusiornermut pisortaq programminillu pilersuisoq avataaneersoq suleqatigalugit.
Programmimi tassani immikkoortut qanoq naatsorsuutinut ilanngunneqartarnissaat ineriartortitseqataaffigisimavara. Aallaqqaammut isumaqarsimavunga naatsorsuutinik nalinginnaasumik inaarsaasassalluta.
Quersuarmiittuutit siullermik naatsorsortussanngoratsigit quersuarmi nikingassutit kontunut aalajangersimasunut inissiinnarpavut. Nikingassutit peerutinngisaannarput.
Programmi ineriartortillugu naammassimmat ukiumullu naatsorsuutinik inaarsaasussanngoratta naatsorsuusiornermut pisortaq annertunerusumik annikinnerusumilluunniit uivilerpoq. Quersuarmiittuutit allattorsimaffii naammassimmata peqquneqarpunga maskiinanni quersuarmiittunut fil-imi allanngortitsissasunga, kukkunersiuisut pasitsannginniassammata. Nioqqutissat tunineranni akiviat 1 procentiinnarmik qaffanneqarpoq, akerlianilli nioqqutissat quersuarmiittuutit 15 procentit angullugit amerlineqarput.
Tamatuma kingorna fili filimut nutaamut toqqorneqarpoq. Quersuarmiittuutinut fil-ivik piiarneqarpoq, kukkunersiuisullu fili nutaaq kisiat pivaat, taannalu nutaaliaarpasissorujussuuvoq uppernarpasillunilu.
Tullinnguuppoq quersuarmiittuutit aningaasatigut nalingisa quersuarmiittullu naliviisa naleqqussarnissaat. Tamatumunnga pisariaqarpoq quersuarmiittut naatsorsuutinut allattorneqarnissaat, tassanilu kontu illua’tungaaniittoq, nioqqutissanik atuinermut nioqqutissanillu iluarsiissutinik ingerlatsinermut allanneqarpoq. Taamaalilluni ilanngaatissat suli ilanngaatiginagit iluanaarutit kusanarnerorpasilerput.
Allaaserineqartoq aviisimi Sermitsiami tamakkiisumik atuaruk. Aviisi uani pisiarineqarsinnaavoq: