Nuuk
Mattammik tillinniarnermi innuttaasunit ikiorneqarnissartik politiit neriuutigaat
Tillinniat Nuummi Royal Greenlandip suliffissuanit mamarluartut naleqarluartut 20 kiilunik oqimaassusillit aallaruppaat
Sapaatip akunnerata naanerani Nuummi allakkajaamik tillinniarnerup paasiniarnerani politiit innuttaasunit tusagaqarnissartik neriuutigaat.
Arfininngornerup aggustip 23-ata unnuaani Nuummi Royal Greenlandip suliffissuani tillinniartoqarpoq, tamatumani tillinniat mattak 20 kiilunik oqimaassusilik sushillu poortat sisamat aallarussimallugit.
– Piffissami kingullermi illoqarfimmi tillinniarnerpassuit ilagaat. Neriuppugut innuttaasunit takunnissimasinnaasunit saaffigineqarumaarluta, Sermersuup politeeqarfiani pigaartut pisortaat Mikael Kofoed erseqqissaavoq.
Qimaapallassimapput
Royal Greenlandimi Nunap Iluani Tuniagassanut Immikkoortoqarfimmi tuniniaanermi pisortap Malik Hegelund Olsenip oqaatigaa, tillinniat igalaaq kuupiimik kikiassuarnillu piiaammik, tamaanga qimanneqarsimasunik, aserorlugu isersimasut.
– Ilimagaarput kalerrisaarut arfininngornermi unnuakkut ataatsip missaani aallartimmat tillinniat qimaapallassimasut, Malik Hegelund Olsen oqarpoq.
Sulifeqarfik ilisimasaqarfigaat
Tamatuma saniatigut tuniniaanermut pisortap ilimagaa tullinniat suliffeqarfiup iluani suleriaaseq ilisimasaqarfigisimagaat.
– Inimi tillinniat iserfianni qerititsiveqarpoq nioqqutissanik sulisunut tuniniartakkanik, nunap iluani tuniniagassat qerititsivimmi nioqqutissaasivimmiillutik, taannalu filmiliuteqarpoq nakkutilliissutinik, Malik Hegelund Olsen paasissutissiivoq.
Aqqusinermi tuniniassavaat
Royal Greenland aamma innuttaasunit, pisimasumik paasissutissiisinnaasunit tusagaqarusuppoq.
– Naatsorsuutigaarput tillinniat mattaannaviit piniarsimagaat, tassa tamakkua anngiortumik tuniniaanermi akikitsuummata. Taamaattumik inunnit, aqqusinermi mattannik tuniniaasunik takunnittunit tusagaqarusoqaagut, Malik Hegelund Olsen oqarpoq.
Royal Greenlandip suliffissuaq tillinniaqqittoqarnissaanut annertunerusumik isumannaarsulerpaa.