McCartney, akuliutinngilluinnarit
Greenpeacep Issittumi uuliasiorluni qillerinissanut akerlerinninnera tusaamasarsuarnit soorlu Beatles'ikkunni ilaasortaasimasumit Paul McCartney'mit tapersersorneqarpoq. Kisianni taanna akuliuttariaqanngilaq, kalaallit folketingimut ilaasortaatitaat oqarput
Greenpeacep Issittumi uuliasiorluni qillerinissanut akerliunera nipilersortartumit Paul McCartney, isiginnaartitsisartumit Penélope Cruz aamma isiginnaartitsisartumit ilitsersuisumillu Robert Redford tapersersorneqarput.
Tamanna ernumanarpoq, Sara Olsvig, Inuit Ataqatigiit isumaqarpoq taassuma nunarsuarmi tusaamasarsuit akuliunnissaat takujumanngikkaluaqaa:
- Ernummatigaara inuit tusaamasarsuit Paul McCartney'tut ittut oqallinnermut peqataalernerat. Takunikuuarput taassuma, Brigitte Bardot aamma Pamela Andersonip puisit arfanniartarnerlu pillugit akuliunnerinit ajunaarnersuartullusooq uagutsinnut kinguneqarsinnaanerat, Sara Olsvig danskit aviisiannut BT'mut oqarpoq.
- Uanga Greenpeace oqaloqatigilluartarpara aamma Kalaallit Nunaanni uuliasiorluni qillerinermit nalunaarusiaq tusarniaanermi akissutigineqartoq ilanngunnikuuaat. Isumaqarpunga ajunngilluinnartoq. Kisianni tusaamasarsuit saqqumilaartarnerat inunnut sumiiffinni inuusunut neriniartussaasunullu annertoorujussuarmik kingunipiloqarsinnaavoq, Sara Olsvig oqarpoq.
BT naapertorlugu Doris Jakobsen, Siumut Sara Olsvigip isornartorsiutaanut tapersiivoq.
Greenpeace: Tassa pingaarnerpaaq
Greenpeacemi nunani avannarlerni attaveqatigiinnermik pisortaq Birgitte Lesanner aviisimut oqarpoq, suliniaqatigiiffiup oqariartuutaannik saqqummiiniarnermi tusaamasarsuit iluaqqutaaqisut:
- Tamaaliorneq nukittoquteqarpoq tusaamasarsuit peqataaniartillutik pingaartitsilluinnarnermik ersersitsisarput, inuit amerlasoorsuullutik Issittumik illersueqataarusunnerannik ersersitsisarmat. Tamanna inuppassuarnut sunniuteqarmat, oqarpoq.
Ukioq manna Greenpeacep Issittoq pillugu suliniutaa Alaskamut tunnganeruvoq, suliniaqatigiiffiup umiarsuaataasa tamaani Shellip qillerivii malinnaaffigai, taakkua Alaskap sineriaani uuliamik ujaasinertik aallartittussaavaat.