Meeqqanik 3.700-nik paaqqinnittussaasut: Sulisut 100-t sinnillit amigaataapput
Meeqqanik paaqqinninneq nunatsinni sumiiffippassuarni sakkortuumik unammillerneqarpoq. Maanna Namminersorlutik Oqartussat pilersaarusiorput. Ajornartorsiutilli annersaat – sulisussarsiorneq - aaqqikkuminaassaaq.
Meeqqat mikisut 3.700-t ullaat tamaasa meeqqeriviliaanneqarlutillu meeraaqqeriviliaanneqartarput. Sulisut 880-it taakkua tigunissaannut piareersimasarput, taakkuali affaat inorlugit (46 procentit) perorsaasutut ilinniagaqarsimapput imaluunniit perorsaanermik allatut ilinniagaqarsimasuullutik.
Aviisi AG taama allappoq.
Naalakkersuisut isumaqarput, tamanna qanoq iliuuseqarfigineqartariaqartoq, taamaattorli sulisut tamarmik ulluunerani neqeroorutini suliarisartagaat nersualaarluinnarlugu. Taakkua ilungersorlutik sulinngippata meeqqat angajoqqaallu eqqugaanerlussapput:
- Pisortani ulluunerani neqeroorutini sulisut ilinniagaqanngitsut suliartortilluta meeqqanik arlaannut tunniussisarnissatsinnut pingaaruteqarluinnarput, taamaammallu tamanna inuiaqatigiittut ingerlalluarnissatsinnut pingaarluinnartuulluni, Meeqqanut, Inuusuttunut Ilaqutariinnullu Naalakkersuisoq, Aqqaluaq B. Egede, erseqqissaavoq.
Qanorli ililluni meeqqerivinni pitsaassuseq qaffassarneqarsinnaava? Tamanna suli atualinngitsunut periusissiami nutaami »Meeraaneq nalitooq«-mik qulequtaqartumi Aqqaluaq B. Egedemillu siulequtserneqarsimasumi 2030-llu tungaanut ingerlasussami siunnersuutini arlalissuarni takuneqarsinnaavoq.
Suliunnaaginnartartut
Ulluunerani paaqqinnittarfeqarneq nunatsinni suliaqarfiit tatineqarsimanerpaartaannut ilaavoq. Naatsorsuinerit kingulliit naapertorlugit paaqqinniffinni 78-ini perorsaasut 137-t amigaataapput. Taamaalillluni inatsimmi minnerpaaffissamik aalajangersakkat naammassineqarsimanngillat.
- Ajoraluartumik suliassaqarfimmi sulisut ilinniarsimasut ima amigaataatigipput paaqqinnittarfinni ulluinnarni suliassat isumaginissaanni aammalu meeqqat peqatigalugit perorsaanikkut ineriartuutaasumik suliassat suliarinissaanni qaqutigut sulisut ilinniarsimasut naammanneq ajormata.
Aviisimi AG-mi atuarnerusinnaavutit. Aviisi uani pissarsiariuk:
