binzerip soraarnera
Michael Binzer Tele-Postimi pisortaanerujunnaarpoq
- Misigisimajunnaarpunga uannut tatiginnittoqarneranik, uanga isumara malillugu tamanna pisariaqarpoq ingerlatsiviup aqunnissaanut aamma siunissamut iliuusissatut pilersaarutip naammassineqarnissaanut, tusagassiutinut nalunaarummi Michael Binzer oqarpoq
Michael Binzer Tele-Postimit pisortaanertut soraarniuteqarpoq.
Suliffeqarfik tusagassiutinut nalunaaruteqarpoq.
Tele-Post-ip septembarip aallartinnerani siulersuisui ataatsimiipput, siunissamut pilersaarut pillugu isumasioqatigiillutik aamma Sisimiuni inuttaasunik oqaloqateqarlutik. Tamatumunnga atatillugu pisortaaneq Michael Binzer atorfimminit soraarniuteqarpoq.
- Uanga piginnaatinneqarsimavunga siunissamut iliuusissatut pilersaarutip anguniaqarluarfiusup suliarineqarnerani siuttuunissannut. Ajuusaarutigaara uanga atorfinnit soraarniuteqarnera, kisianni misigisimavunga uannut tatiginnittoqarunnaartoq, uanga isumara malillugu tamanna pisariaqarpoq ingerlatsiviup aqunnissaanut aamma siunissamut iliuusissatut pilersaarutip naammassineqarnissaanut, tusagassiutinut nalunaarummi Michael Binzer oqarpoq.
- Siulersuisut ajuusaarutigaat Michaelip soraarniuteqarnera tigugamikku. Suliat ataasiakkaat ingerlasimanerat apeqqutaatinnagu siulersuisuit qilanaarisimagaluarpaat suli Michaelip suleqatigiinnarnissaa. Siulersuisut pingaartippaat aamma qujassutigalugu Michaelip suliaq annertooq ingerlassimasaa, siulersuisut siulittaasuat Agner N. Mark nalunaarummi nassuiaavoq.
Isertitat ikilisut
Siulersuisut Tele-Postip ukiup affaanut naatsorsuutai akuersissutigaat, tassani takuneqarsinnaavoq kaaviiaartitat ikileriarnerat 2013-imit 409,5 million koruuninit ukioq manna piffissami assingani 394,9 million koruuninut. Akileraaruteqannginnermi naatsorsuutitigut angusat assinganit ikileriarsimapput 49,2 million koruuniniit 42,5 million koruuninut.
Pisortap tullia Steen Montgomery-Andersen pisortaanerugallartutut inissippoq.
Michael Binzer piffissami soraarnissami tungaanut ingerlatsivimmut attuumassuteqarallassaaq.