Aalisarneq
Misileraalluni saarullinniarneq
Saarullinnik misileraalluni aalisarnissamut Naalakkersuisut 5.000 tonsinik pisassiissuteqarput
Nunatsinni aalisariutit ningittagarsuutit kilisaatillu angivallaanngitsut sinerissap qanittuani aalisartartut nunatta kitaata avataani misileraallutik ukioq manna saarullinniarsinnaapput.
Naalakkersuisut saarulliit misileraalluni aalisarneqarsinnaasut 5.000 tonsit pisassiissutigeqqammerpaat, Namminersorlutik Oqartussat allapput.
Avataani misileraalluni saarullinniarneq Nunarsuarnit Kitsissuarsunnut pissaaq.
Misileraalluni saarullinniarneq Pinngortitaleriffiup innersuussutai naapertorlugit aalisartoqassasoq, Namminersorlutik Oqartussanit ilisimatitsissutigineqarpoq.
- Misileraanissamut akuersissummi piumasaqaataavoq saarullinniarfigineqartoq siammasuussasoq, aalisarfigineqartoq ataasiinnaassanngitsoq. Saarulliit suffinerisa nalaanni apriilip aallaqqaataanit maajip 31-annut 2017-imi misileraalluni aalisartoqassanngilaq, Namminersorlutik Oqartussat allapput.
Misileraalluni aalisarnissamut qinnuteqarfissaq kingulleq tassaavoq marsip aallaqqaataa 2017.