Mittarfeqarfiit 2013-imi amigartoortoq

Naak ikinnerusunik timmisartumik angalasoqaraluartoq Kalaallit Nunaannilu aningaasat tungaatigut ingerlanerliortoqaraluartoq Mittarfeqarfiit amigatoorutit 2013-imi millisippaat.

Ukiumi naatsorsuutit inernerisa ersersippaat amigartoorutit 3,4 millioner koruuniusut, ukiup siuliani 9,9 millioner koruuniusimallutik.

Mittarfeqarfiit 2013-imi kaaviiaartitaanit katillugit 358 koruuniusunit ingerlatsinermi angusat minus 3,4 millioner koruuniupput. Ukiumi annermik aningaasarsiorfiusartut marluk nalinginnaasumit isertitakinnerusimapput: akileraarutit orsussamillu tunisineq, taamaattorli annikinnerusumik aningaasarsiortoqaraluartoq suliffeqarfiup iluani pitsaanerusumik sullerissuseqalernermik taarserneqarpoq.

- Aaqqissuussisimaneq annikillisarsimavarput ilaatigullu eqaannerusumik pisiniartarnermut politikkitaarsimalluta, tamannalu kinguneqarluarsimavoq. Ajoraluartumik inuussutissarsiornermik ingerlatagut angalasullu amerlassusaat ikileriarsimapput, taamaalillutalu ilaasunit- timmisartullu minnerinit akileraarutit annaasaqarsimalluta, Mittarfeqarfinni pisortaq Jens Lauridsen oqarpoq.

Nunatta kujataani angallanneq
Erseqqissaavigaa ingammik Kujataani timmisartoqarfiit 2013-imi ikinnerusunik timmisartorfiusimanerat pissutaalluni aningaasarsiornermut pitsaanngitsup tungaanut ingerlalerneranut sunniuteqarsimasut. Aammattaaq tamanna Mittarfeqarfiit akunnittarfinnik ingerlatsineranut sunniuteqarsimavoq, tamannalu siusinnerusukkulli amigartoorutaasareerluni ingerlanneqarsimavortaaq.

Tamakku saniatigut ilaatigut Air Greenlandip timmisartuutaa Dash-8 annikinnerusumik orsussamik atuisarmat orsussamik annikinnerusumik tunisisoqarsimavoq.

- Qitiusumik niuerfipput isigissagaanni, tassaasoq mittarfinnik ingerlatsineq oqartariaqarpugut pitsaalluinnartumik niuerfeqarluta. Missingersuutitsinnik artorsartitsisut tassaapput akunnittarfiutigut allallu Mittarfeqarfiit suliassaattut arlalissuit suliakkiutaasarsimasut, imaluunniit uagut oqaluttuarisaanermi suliarisarsimasatta ingerlatiinnarnissaat aalajangiussimagatsigu. Maannakkorpiaq misissorparput siunissami tamakkua qanoq annertutigisumik suliarisassanerlutigit, Jens Lauridsen nassuiaavoq.

Siunissami sinneqartoortalernissat
Ukiuni tulliuttuni mittarfinnut akileraarutit annikillisaavigineqarnissaata anguniarneqarnissaat erseqqissumik oqaatigaa, aammalu naatsorsuutit sinneqartoorfiusut saqqummiunneqarumaarnissaat siunertarineqartoq oqaatigalugu.

Mittarfeqarfiit ukiumoortumik Namminersorlutik Oqartussanut akiliisarput, taamaalillutillu nunap karsianut tapiisarlutik. 2013-imi tapiissut 12,5 millioner koruuninik annertussuseqarpoq.