Bekymringer
Naaja: Isumannaallisaanermut piumasaqaatit aalajangiusimavisigit?
Naalakkersuisut aalajangiusimannikkusuppat qillerinerni uuliasioqatigiiffiit isumannaallisaanermut piumasaqaatinik sakkukilliiniarneranni? Taamatut aperivoq Naaja Nathanielsen, IA
– Tusagassiorfitsigut tutsiunneqarpoq qillerinerni qilleriviit marluunissaannik oqartussaasut piumasaqaataat uuliasioqatigiiffiit Issittumi ingerlatsisut saneqqutaarniarsarigaat.
– Taamaattumik soqutiginassaaq tusassallugu uuliasioqatigiiffiit kissaatigisaannut Naalakkersuisut isorinnittumik isiginninnersut. Naalakkersuisut manna tikillugu isumannaallisaasaanermut piumasaqaatit atuuttut illersorsimavaat, inuussutissarsiornermulli aatsitassanullu Naalakkersuisoq aamma oqarsimavoq uuliasioqatigiiffiit tunngavilersuutaannut tusaaniarnissamut ammallutik.
Taamatut allappoq Naaja Nathanielsen. Tamanna pivoq paragraf 37 tunngavigalugu apeqqummini, tassani apeqqutigigamiuk qillerinermi qillerviit marluunissaannik Kalaallit Nunaata piumasaqaataanut saneqqutaariniarlutik uuliasioqatigiiffiit saaffiginnissutaannut Naalakkersuisut qanoq akissuteqarsimanersut.
– Naalakkersuisullu piareersimappat erseqqissassallugu qilleriviit marluunissaanik piumasaqaatini Kalaallit Nunaata allanngortinnianngikkaa?
Aamma atuaruk: Greenpeace: Mærsk mianersuaalliorpoq
– Neriuutigeqaara Naalakkersuisut piareersimasut uuliasioqatigiiffiit kissaatigisaannut ersarissumik itigartitsinissaminnut. Tamanna uagutsinnut, isumannaallisaanermi malittarisassat appartinnissaanik Naalakkersuisut isumaliuteqarnerannik ernumassuteqartunut, toqqissisimalersitseqqissaaq, Naaja Nathanielsen oqarpoq.
Naaja Nathanielsenip naatsorsuutigaa apeqqutini sapaatip akunnerani tullermi akineqassasut.
Aviisimi AG-mi annertunerusumik atuarsinnaavutit