Naalakkersuisoq paasissutisseerusunngitsoq

Kalaallit Airportsip siulersuisuini siulittaasup Jóhannus Egholm Hansenip Namminersorlutik Oqartussanut mailikkut nassiussaani erseqqissumik allassimavoq, Qaqortumi mittarfiliornissamut nutaamik neqeroortitsinissaq iluatsinneqassappat aningaasat amerlanerusut pisariaqartinneqartut imaluunniit annikinnerusunik aningaasartuuteqartoqartariaqartoq.

Siulittaasoq isumaqarpoq, mittarfik naannerusuoq aaqqiissutissatuaasoq. Allaqatigiissimanermi Sermitsiaq.AG-p takusimasaani taamatut allassimasoqarpoq.

Aaqqissuisoqarfimmit Attaveqarnermut Naalakkersuisoq Karl Frederik Danielsen, KAIR-imi siulersuisut siulittaasuata nalunaarutaanut erseqqilluinnartumut isummertinniarneqaraluarsimavoq.

Naannerusumik mittarfiliornissaq aaqqiissutissaava, imaluunniit aningaasanik amerlanerusunik pissarsisoqassava?

- Taamatut inississimanerup kingunissai pillugit Naalakkersuisut Kalaallit Airports A/S-imik oqaloqateqarput, Naalakkersuisoq allakkatigut akissuteqarluni allappoq.

Naalakkersuisut tullissaanik neqeroortitsinerup taamatut inerneqaqqinnginnissaa qanoq qulakkeerniarpaat?

- Naalakkersuisut tatigaat, Kalaallit Airports A/S-ip suliassamik siunertamut naapertuuttumik isumaginnissinnaanerat, taanna allappoq.

Mittarfissap naannerutinniarneqarnera pillugu kommuni oqaloqatigineqarpa?

- Kommuni soorunami suliarinnittussarsiuussinerup taamaatiinnarneqarnera pillugu ilisimatinneqarsimavoq, aamma Naalakkersuisut tigussaasumik oqaloqatigineqartuarput, eqqumaffigineqassaarli suliaq suli naammassineqanngimmat, Naalakkersuisoq Karl Frederik Danielsen oqarpoq.