Naalakkersuisut sorsuttoqarneranut qisuariartut: Inatsisissatut siunnersuut inissinneqarsimavoq, pillaatissatulli iliuusissaanngitsut

Inatsisartut inatsisissatut siunnersuut, Naalakkersuisut Ruslandimut pillaatitut iliuuseqarnissaannut ammaasussaq sapaatip-akunnerani matumani nukiginnartutut suliarissavaaat.

Naalakkersuisut Ruslandip Ukrainemut saassussinera pissutigalugu, Ruslandimut pillaatitut iliuuseqarusupput, inatsimmulli tunngaviusussaq suli inissinneqarsimanani.

Inatsisissatut siunnersuuteqartoqarniartoq siusinnerusukkut nalunaarutigineqarnikuuvoq, siunnersuullu maanna naammassillugu suliarineqarsimalerpoq Inatsisartullu oqaluuserisassaannut ilanngunneqaqqammerluni. Siunnersuummi atuarneqarsinnaavoq, Naalakkersuisut pillaatitut sorpianik iliuuseqarniarnersut suli inissinneqarsimanngitsoq.

Siunnersuut akuerineqassappat, Naalakkersuisut pillaatitut iliuusissanik, EU-mi, FN-imi nunaniluunniit allanit akuerineqareersunik atuutsitsisinnaalissapput.

Siunnersuummut ilanngussami takuneqarsinnaavoq, EU-mit pillaatissatut iliuusissatut akuerineqarsimasut amerlalluinnartut. Danmarkimi Inuussutissarsiornermut ministeeriaqarfik tusarniaassummut akissuteqarluni allassimavoq, Naalakkersuisut pillaatitut sunik iliuuseqarniarnersut takuneqarsinnaasariaqartoq. Pillaatitummi iliuusissat ilaat danskit inatsisaannik malinnittussaammata, pineqartut danskit suli akisussaaffigimmatikkit, Danmarkimi ministeeriaqarfik allappoq.

Naalakkersuisut Siulittaasuata Naalakkersuisoqarfianit akissuteqarluni allattoqarsimavoq:

Tamaviaarluni sulisoqartoq

- Pillaatitut iliuusissat sorliit Naalakkersuisut tamatuma kingorna ilaaffigilernissaat kissaatigineraa, maannakkorpiaq tamakkiisumik paasisimaarineqanngilaq. Aammalu Naalakkersuisut pillaatitut iliuusissat ilaaffigilernissaannut aalajanginnginneranni, Inatsisartuni Nunanut Allanut, Sillimaniarnermullu Ataatsimiititaliaq Naalakkersuisut isumasiortussaavaat.

- Pillaatitut iliuusissat sorliit Naalakkersuisut tamatuma kingorna ilaaffigilissaneraat paasinarsisinniarlugu ulapputigalugit suliarineqarput. Suliassaqarfinnut akisussaaffigilerlugit tiguneqarsimanngitsunut, danskit inatsisaannik pisariaqartitsiviusunut, tunngatillugu tamanna aamma atuuppoq, Naalakkersuisut Siulittaasuata Naalakkersuisoqarfianit oqaatigineqarpoq.

Pillaatitut iliuuseqarnerup qanoq kinguneqarsinnaaneranut tunngatillugu naalakkersuisoqarfik allappoq, "tamanna inuussutissarsiortunut aningaasaqarnikkut allaffissornikkullu sunniuteqarnernik malitseqarsinnaavoq, tassami avammut nioqquteqarnerup niuernerullu unitsikkallarneqarnerat aningaasaqarnikkut annaasaqarnermik malitseqarsinnaammat."

Siunnersuummut nassuiaammi aamma oqaatigineqarpoq, Rusland nunani tamalaani akiliisarfimmit SWIFT-imit mattunneqarmat, Ruslandimik niueqateqarneq unitsinneqarsimasoq.

Kalaallit Nunaata siorna Ruslandimut tunisimasai 580 millioner koruuninik naleqarsimapput.

Múte: Kalaallit Nunaata ilanngunnissaa pissusissamisoorpoq

Siunnersuut Naalakkersuisut Siulittaasuata Naalakkersuisoqarfianeerpoq, Forslaget hører under Formandens Departement, og Múte B. Egedellu siunnersuut Inatsisartunut saqqummiuttussaallugu. Siulittaasoq isumaqarpoq, Kalaallit Nunaata pillaatitut iliuuseqartoqarneranut ilanngunnissaa pissusissamisoortoq:

- Kalaallit Nunaata Ruslandip Ukraine-mut saassussinera assuarissagaa, nunatsinni maani politikkikkut atituumik isumaqatigiiffigineqarpoq. Taamaattumillu Kalaallit Nunaata EU-p aamma nunat allat arlallit Ruslandimut pillaatitut iliuusissanik atuutsitsilersimanerannut ilaalernissaa pissusissamisoorluinnarpoq, Naalakkersuisut Siulittaasuata oqaaseqaatai, inatsisissatut siunnersuummut ilanngullugu saqqummiunneqartumi allassimavoq.

Inatsisissatut siunnersuut sisamanngornermi siullermeerlugu, aappassaaneerlugu pingajussaaneerlugulu suliarineqassaaq.