binzerip soraarnera
Naalakkersuisut: Tele-Postip siulersuisui sulilluartut qularutiginngilarput
- Suliffeqarfimmi nutaamik piginnaasalimmik pisortassarsiornissamik siulersuisut annertuumik maanna suliassaqarput, Aleqa Hammond oqarpoq
- Naalakkersuisut ilisimatinneqarput (Tele-Postimi pisortaaneq Michael Binzerip atorfimminit soraarniuteqarluni aalajangerneranik).
Naalakkersuisut tusagassiutinut nalunaaruteqarput.
Michael Binzer suliffeqarfimmi 'annertuumik ilaatigut unammillerneqarnerunermik inuiaqatigiinnullu iluaqutaasumik attaveqatigiinnerup annertusarneqarneranik aqqusaagaqarnerani annertuumik allanngortitereqataasimasoq', nalunaarutigineqarpoq.
- Michael Binzerip tunniusimalluni angusaanut qujaffigerusupparput, selskabimmi pitsaasumik ineriartorneranut suleqataasimavoq siunissamilu angusaqarluarnissaanik kissaapparput, Naalakkersuisut siulittaasuat Aleqa Hammod, Siumut, allappoq.
Michael Binzer Tele-Postimi pisortaanertut apriilip aallaqqaataani 2013-mi atorfeqalerpoq.
Air Greenlandimi ukiuni tallimani pisortaanertut siuliani atorfeqarpoq.
Siulersuisut suliassaat
- Selskabimi ineriartupiloorfiusumi, innuttaasut ulluinnarni inuunerannut sunniuteqartorujussuarmik suliaqarfiusumi, nutaamik piginnaasalimmik pisortassarsiornissamik siulersuisut annertuumik maanna suliassaqarput. Suliassap tamanna siulersuisunit naammassineqarsinnaanera Naalakkersuisut qularutiginngilaat, neriuutigaallu Tele Greenland siunissami unamminartunik aqqusaagaqarnissaanut aalajaatsumik suliarinnissinnaasumik pisortassarsiumaartut, Aleqa Hammond tusagassiutinut nalunaarummi oqarpoq.
Michael Binzer Tele-Postimi pisortaanertut soraarniuteqarpoq pingasunngornermi saqqummiunneqartumik. Tatigineqartinneqannginnini pissutigalugu soraarniuteqarpoq.
Sermitsiaq.AGp Michael Binzer attaveqarfigigaluarpaa, inuttaatali itisilerusunngilaa sooq soraarniuteqarnerluni.
Pisortap tullia Steen Montgomery-Andersen pisortaanerugallartutut inissippoq.
Dansk Folkepartip Kalaallit Nunaata aningaasaqarnera pillugu Folketingimi oqallissaarinera Sermitsiaq.AGp Aleqa Hammond oqaaseqartinniaraluarpaa, marlunngormalli suli akineqanngilaq.
Michael Binzeri pillugu annertunerusumik aviisimi Sermitsiami tallimanngorpat saqqummersussami atuarsinnaavutit