Pisortani atorfillit
Namminersorlutik Oqartussani sulisut amerliartuinnartut
Namminersorlutik Oqartussani atorfillit ukiut tamaasa amerleriartarput.
Sulisut aappaagu 98-inik amerleriarlutik 4.496-inngortussaasut, 2018-imut aningaasanut inatsisissatut siunnersuummi atuarneqarsinnaavoq. Aningaasaqarnermut akileraartarnermut naalakkersuisoqarfik aamma peqqissutsimut naalakkesuisoqarfimmi sulisut ingammik amerleriaateqassapput.
Sulisitsisut annersaat
Namminersorlutik Oqartussat kommnunit peqatigalugit sulisitsisut annerpaartaraat.
Pisortani atorfeqartut taakkulu ataanni ingerlatseqatigiiffinni sulisut 10.934-iusut, Inuussutissarsiornermut Naalakkersuisoqarfiup nalunaarusiaanuti nutaamut aviisi AG unnersuussilluni allappoq.
Namminersorlutik Oqartussat aappaagu amerleriarpata sulisut 11.000-nit amerlanerulerniarpasipput.
Sulisinnaassuseqartut 41 procentii
Kisitsit sulisinnaasut 26.764-iusut tunngavigalugit isiginiarneqassaaq; tassa innuttaasut 41 procentii pisortanik sulisitsisoqarput, AG taama allappoq.
Kalaallit Nunaanni inuit 1.000-iugaangata 200-t pisortani sulipput tamannalu nunat tamat akornanni annertunersaalluni. Norge tullersortitut inissisimavoq, tappavanimi inuit 1.000-iugaangata 162-it pisortani atorfeqaramik Danmarkimili (pingajuattut inissisimasumi) inuit 1.000-iugaangata 153-it pisortani sulisuullutik. Kalaallit Nunaata saniliani, Canadami, inuit 1.000-iugaangata 88-it pisortanut kiffartortuupput.
Namminersorlutik Oqartussani sulisut amerliartornerat ima agguataarneqarput:
Naalakkersuisoqarfik - 2017 - 2018 - plus/minus
- Katillugit: 4398 – 4496 - +98
- Inatsisartut siulittaasoqarfiat: 45 - 45 - 0
- Naalakkersuisut siulittaasuat: 28 – 30 - +2
- Kalaallit Nunaata aallartitaqarfii: 13 – 14 - +1
- Aningaasaqarneq akileraartarnerlu: 199 – 218 - +19
- Akileraartarnermut Aqutsisoqarfik: 121 – 127 - +6
- Namminiilivinnermut, nunanut allanut nunalerinermullu: 27 – 35 - +8
- Isumaginninnermut, ilaqutariinnermut naligiissitaanermullu: 675 – 681 - +6
- Peqqissutsimut: 1496 – 1533 - +37
- Kulturimut, ilinniartitaanermut, ilisimatusarnermut ilageeqarnermullu: 1058 – 1066 - +8
- Aalisarneq piniarnerlu: 44 – 45 - +1
- Inuussutissarsiorneq, suliffeqarneq, niuerneq, nukissiorneq, atuineq, unammilleqatigiinnermut aqutsisoqarfik: 25 – 26 - +1
- Kommunit, nunaqarfiit, isorliunerusut, attaveqagtigiinneq: 23 – 23 – 0
- Ineqarneq: 403 – 420 - +17
- Pinngortitaq avatangiisillu: 37 – 29 - minus 8
Allaaserisaq tamaat aviisimi AG-mi atuaruk, taanna uani digitaliusumik uani ataani atuarsinnaavat: