Aalisarneq
Namminersorlutik Oqartussat avaleraasartuut pillugit pasilliinermut: Naapertuuttumik ingerlatsivugut
Aalisarnermut naalakkersuisoqarfimmit erseqqissarneqarpoq ukioq manna avalaraasaartuunik agguaassinermi inatsisit malinneqarsimasut
Ukioq manna avaleraasartoortassanik 85.000 tonsinik agguaassineq annertuumik isornartorsiorneqarpoq ilaatigut illuatungiliuttunit kiisalu inuussutissarsiuteqartunit Nusukamit KNAPK-milli.
Kingullertut taasat isumaqarput avaleraasartuunik agguaassineq naapertuutinngitsumik tunngaveqarluni ingerlanneqarsimasoq.
Naalakkersuisoqarfimmiilli isornartorsiuineq eqqunngitsuunerarneqarluni.
- Naqissuserlugu erseqqissarusuppara avaleraasartuunik pisassiinerit tamarmik kinaassusersiorani aamma piviusorsiortunik tunngaveqarluni pisimammata, aamma inatsisit naapertoqqissaarlugit pisassiisoqarluni, Aalisarnermut, Piniarnermut Nunalerinermullu Naalakkersuisoqarfimmmi pisortaq Jørgen Isak Olsen oqarpoq.
Nunaqavissut suliffeqarfiutaat
Suliniaqatigiiffiit marluk naalakkersuisoqarfik isornartorsiorpaat aalisartut nunaqavissut avaleraasartoornianermi peqataarusuttut kissataannik tusaaniarsimanngitsutut, aalisarnermullu inatsisip allanngortilluinnarnissaa kissaatigalugu, taamaaliornikkut »kalaallit« avaleraasartoorniarnermi peqataanissaminnut periarfissaqarnerulerlutik.
- Isumaqarpunga nunaqavissunut ukioq manna avaleraasartoortassanik agguaassinermi nunaqavissut siornamut naleqqiullugu peqataatinneqarnerusut. Ingerlatseqatigiiffiit ikinnerpaamik tallimat sinerissap qanittuani aalisartunit piginneqataaffigineqarput. Umiatsiaararsortut aalisariutiniluunniit aalisartut katillugit ikinnerpaamik 250-it ingerlatseqatigiiffinnut piginneqataapput, Jørgen Isak Olsen oqarpoq.
Kattuffiit Arctic Prime Fisheriesimut aamma Malik Seafoodimut avaleraasartoortassiisimaneq isornartorsiorpaat isumaqarlutik, taakkununnga pisassiisimaneq pinngitsoorani utertinneqartariaqartut, pisassinneqarnerallu pissusissamisoortutut isigineqarsinnaanngitsoq.
Iluaqutaavoq
Ingerlatseqatigiiffiilli avaleraasartoortassinneqarmata inatsisit naapertorlugit ingerlanneqarsimasoq oqartoqarpoq.
- Erseqqissarusuppara ingerlatseqatigiiffiit pisassinneqarsimasut tamarmik Aalisarnermut inatsit naapertorlugu pisassinneqarmata, piginneqataassutsit amerlanersaat 1/3-lii nunanit allaneersunit pigineqarsinnaallutik. Nunat tamalaaneersut piginneqataaneri akornutitut tamatigut isigisariaqanngillat. Immikkut ilisimasatik aalisartunut nunatsinneersunut nangittussanngorlugit pisinnaasarmatigik, aalisarnerup akilersinnaasumik ineriartorneranut iluaqutaasinnaallutik, naalakkersuisoqarfimi pisortaq erseqqissaavoq.
Naalakkersuisut pingaarnersiuinerminni pingaartitaat tassaavoq avaleraasartoorniarneq amerlanerpaanit aningaasarsissutigineqarnissaa amerlanerpaanillu aamma suliffissaqartitsisuunissaa. Taakku aalisariutinik nunatsinneersunit angusaqarfigineqarluarsinnaapput, nunatsinneersunit nunatsinnullu akileraartartunik inuttaqarpata.
Akileraarnerusarput
Naalakkersuisoqarfimmit maluginiarneqarpoq naatsorsuilluniassersuussinikkut takuneqarsinnaasoq nunatsinni suliffeqarfik aalisariut nunatsinneersoq atorlugu nunatsinneersumillu inuttaqartoq 10.000 tonisinillu aalisartoq qanoq allaanerutiginersoq aalisariummit nunanit allanit attartorneqartumit nunanillu allamiunik aqumioqartumit. Tassani takuneqarsinnaavoq kalaallit suliffeqarfiutaa nunatsinnut akileraarutaat 8,1 million koruuninik amerlanerusarput, aalisariummut nunamut allameersumut nunanit allamiunik inuttalimmut sanilliullugu.
- Taamaattumik pissutissaqanngilaq ingerlatseqatigiiffiit nunatsinneersut assuarissallugit, taakkumi Landskarsimut ikigisassanngitsunik aningaasaliisarput suliffissaqartitsilluartuullutillu, Jørgen Isak Olsen erseqqissaavoq.