mittarfiit
Narsarsuaq ukiunik 75-inngortorsiussaaq
Juulip 6-anni 2016 ukiut 75-erpiaat qaangiutissapput Narsarsuup tunngavilerneqarneranit. Qanorli isilluni suut tamarmik ukiut 75-it matuma siornatigut aallartissimappat, aamma sooq amerikarmiut Narsarsuarmi mittarfiliorsimappat?
Piffik 1941-mi aasaaneranut kinguartilaariartigu, taamanikkut Qassiarsummi savaatillit tupatsinneqallarmata.
Tassanngaannaq kangerlummi umiarsuit sorsuutit arfineq-pingasut erserput, ataatsimoorlutillu Narsarsuup, taamanikkut inoqanngitsup, avataanut kisarput.
Tyskit tiguaalersoraat
Qassiarsummi toqqissisimarpianngillat, ersissutigigamikku tyskit Kalaallit Nunaannik tiguaanialersoralugit.
Savaatillit ilaata Martin Petersenip qaannaminut ikeriarluni umiarsuit ornippai, kikkuunersut paasiniariartorlugu.
Saniannut pivoq paasivaalu amerkarmiut kangerlummut pulasimasut.
Atortut nunaliaassorpaat
Qassiarsummiut annilaangajunnaarput takornartallu tikilluaqquneqarput.
The U.S. Armyp sakkutuuisa maskiinat atortorpassuillu ingerlaannavik nunaliaassulerpaat.
Holdimi siullermi sakkutuut sakkutuullu naalagaat 500-t missaanniipput. Tamakkua narsaq ujaraajarlugulu manissartussaavaat mittarfiliorlutillu stålmåttinik qallikkamik.
Sukkasuumik sanavaat
Tamatuma saniatigut sakkutuunut timmisartortartunullu barakkinik illoqarfiliortoqassaaq umiarsuarnullu anginerusunut umiarsualiviliortoqassalluni.
Aasap ingerlanerani umiarsuit sakkutuullu amerlanerusut tikittarput, juullillu missaani mittarfik timmisartunit miffigineqarnissaminut annertunerusumik annikinnerusumilluunniit piareerpoq.
Timmisartoq siulleq 1942-mi januaarip 24-anni mippoq.
Oqaluttuap pissanganartup sinnera Sermitsiami atuaruk