Pinngortitamit nerisassat
Nassuttooq tuttoqarluarpoq
Aaffaap nalingaa tuttunniarsinnaaneq august-ip aallaqqaataaniilli ammaanneqareernikuummat. Kisianni tuttunniartoqarsinnaalereeraluartoq Aasiaat kalaalimineerniarfiani august-i qaammat tuttuerniat assut akuttupput, qaammatip ingerlanerani marlussoriaannarluni tikiussisoqarnikuummat. Aattaat ippassaq, pingasunngornermi 26. august, Ikerasaarsunniik Umiivimmi pisanik tikiussisoqaqqippoq
Qaammatip aallartinnerata nalaani Nassuttuumiissimasut ilaannit oqaatingineqarpoq Nassuttooq ukioq kingullertulli tuttulissuusoq naak takusat amerlanersaat suli kusatsissimanngikkaluartut, tassa august-ip naanerata missaa, oktober-imut, kusatsiffingisaramikku.
Piaqqineri kingusissimapput
August-imi sapaatip akunnera siulleq Nassuttuumi piaqqat takusat suli mikisuararsuusut oqaatingineqarpoq. Taamaattoqarnera tuttut piaqqinerisa kingusissimaneranut takussutissaasoq oqaatingineqarluni.
Tuttut piniangaalernerisa nalaani Nassuttuup iluatungaa panersimanermingut naanerlutsitersimasoq eqqaaneqarpoq naak sinerissamut qanittua puttumik isungutsertarnermingut naggorinnerungaluartoq.
Umimmaat
Nassuttuumi umimmaat amerlatsikkiartornerat eqqarsaatingalugu oqaloqatigisama isummani uaniisillugu tamassuma tungaa eqqaavaa, tuttut umimmaallu aasaanerani nerisaat assingiinngittuusaraluarlutik ukiukkut aputip ataani angusinnaasartik pileraangamikku assingiinnik nerisaqalersarnermikkut umimmaat amerlatsikkiartornerat tuttoqarnermut sunniuteqassasoq oqaatingineqarluni.
Ukiut siuliinit aavartartoqannginnerusoq
Aasaq manna aavarfissanngoqqammernerata nalaani, august-imi sapaatip akunnera siulleq, Nassuttooq pisarnertut aavartartutoqqanit aavartukinnerunera tuttut amerlanerpaartaasa suli iluamik kusatsissimannginnerannik, aammali Aasianni (qanittuanilu) piniartut aalisartullu piffissami tassani qaleralinniarrannerunerannik, peqquteqartinneqartoq naggataatingut eqqaaneqarpoq. Siunnersuutitut oqaatingineqarpoq aavartalerlaani tuttut takusat siulliit ingerlaannaq pisarinngikkaluarlugit piniangassaasut kusanarnersiungassaallutilli, tunnullit mamarnerusarmata.
Pinngortitami nerisassat Sermitsiaq.AG-mi sammisaritinneqarpoq. Sammisarineqartumut tunngatillugu allaaserineqartut allat uani takukkit