Aalisarneq
Nipisanniarneq aallartingajalerpoq
Nipisanniarneq februarip 29-annit juulip 15-iannut pissaaq
Upernaleqimmat nipisanniarnissaq allartittussanngorpoq. Tassami nipisanniarneq februarip 29-annit juulip 15-iannut pissaaq.
Kitaata sineriaani aqutsiveqarfiit maannakkut arfineq marluussapput. Aqutsiveqarfiit ataasiakkaarlugit pisassinneqassapput, taakkunani ulluni amerlanerpaani 47-ni aalisartoqarsinnaassalluni.
Pisassiissutit
Aalisarneq kingusinnerpaamik ullut aalisarfiusut 47-t nallerneqarpata unitsinneqassasoq, aalisarnermut naalakkersuisoqarfik ilisimatitsivoq. Aqutsiveqarfimmut pisassiissutigineqartut ullut taakku nallertinnagit aalisarneqarpata aalisarneq unitsinneqassaaq.
- Sumiiffinni aalisartut peqatigiiffiisa tunitsiviisalu isumaqatigiissutigissavaat aqutsiveqarfimmi aalisalernissaq qaqugu aallartinneqassanersoq, Namminersorlutik Oqartussat allapput.
Taassuma saniatigut ilisimatitsissutigineqarpoq, aalisalernissap aallartinneqarnissaata isumaqatigiissutigineqarnerani pingaartinneqarluni sianigineqassaaq aalisarneq aallartinneqassammat suaat aatsaat inerissimalerpata.
Atuaruk: Nipisanniarneq MSC-mik akuersissuteqarfigineqarpoq
Akuersissuteqassasut
Ulloq aqutsiveqarfimmi tunisisinnaalernissap aallartinneqarnissaanut kissaatigineqartoq Naalakkersuisoqarfimmut ilisimatitsissutigineqassaaq, Naalakkersuisoqarfimmit tusagassiuutinut kingorna nalunaarutigineqassalluni aalisalernissap aallartiffissaa.
Nipisanniarsinnaanermut akuersissuteqartoqassaaq, akuersissut qinnutigineqarsinnaalluni. Akuersissut aqutsiveqarfinnut tamanut atuuppoq.