Nitter: Aningaasaqarneq oqimaaqatigiissinneqalersinnaavoq
Kim Kielsenip nunamik ammaaqqinnermi immikkoortup tulliata aallartinneqarnissaa nalunaarutigimmagu, Air Greenlandimi pisortaq isumallualersimavoq. Taanna isumaqarpoq, ukioq manna aningaasaqarneq oqimaaqatigissinneqalersinnaasoq.
Corona ajornartorsiortitsilermat nunalu martisp 20-ani matuneqarmat, Air Greenland ajornartuuittussatut isikkoqaleraluarpoq. Timmisartuutileqatigiiffimmi pisortaanerup Jacob Nitter Sørensenip siunissap ajornerpaatut isikkoqalernerani ernummatigisimavaa, millioninik pingasunik kisitsisitalinnik amigartooruteqartoqarnissaa, taanna Sermitsiaq.AG-mut oqaluttuarpoq.
Ullumikkumiilli aallartittumik killeqanngitsumik ilaasoqarsinnaaneq ammaanneqarmat isumalluartoqalersimasoq, pisortaq naliliivoq.
- Tamatuma malitsigisaanik aningaasaqarnerput pitsaanerulissaaq. Suli pitsaanerulinngilaq, ajornartorsiuli ajorata qaangersinnaanngorunarparput. Eqqarsarpunga, Covid-19 tuniluuteqqilinngippat naatsorsuutiginngisamillu allamik pisoqanngippat, aningaasaqarnerput oqimaaqatigiissinneqalersinnaasoq, Jacob Nitter Sørensen oqarpoq.
Piffissaq ilaasoqarnerpaaffiusartoq atorluarneqassasoq
Taassuma erseqqissaatigaa, pissutsit assigiinngitsut arlallit pissutaallutik aningaasaqarneq ajalusuuissimanngitsoq.
- Suliffeqarfimmi sipaarutissanut tunngatillugit iliuuseqapallassimanngikkutta, piginnittuttalu ajornartoornitsinni ikiorserniarluta isumaqatigiissuteqarfigisimanngippatigut, maannakkorpiaq ajornartorsiulivissimassagalurpugut. Aamma piffissap ilaasoqarnerpaaffiusartup naggataata suli atorluarneqarsinnaanera isumalerujuuvoq, pisortaq oqarpoq.
Jacob Nitter Sørensen naapertorlugu, suliffeqarfik juunip, juulip aggustusillu qaammataanni isaatitsinerpaasarpoq, taamaamma annaasimasat ilaannik isertitaqaqqinniarluni bilitsinik tuniniaasoqapallassaaq.
- Ammaqqinnitsinni niuerfik qanoq qisuariassanersoq takussavarpu. Bilitsinik tunisaqaqqissinnaanngoruttat sulisunik amerlanerusunik sulisoqaqqilersinnaavugut, Jacob Nitter Sørensen oqarpoq.
Kujtaanut toqqnnartumik suli timmisartoqartassanngitsoq
Københavnimiit Narsarsuarmut aamma Islandimiit Ilulissanut aqqutit ukioq manna angalaffigineqassanngillat. Aappaaguli piffissat angalaffiunerpaasartut nalinginnaasumik ingerlaqqilissappata, sumut angalarusuttoqarnerunera eqqarsaatigalugu Air Greenland timmisartuliisinnaassaaq, taanna ilisimatitsivoq.
Bilitsilli akikinnerit eqqarsaatigalugit, piffissaq sivisulaartoq ingerlaqqaassagunarpoq neqeroorutaasartut pitsaasut atoqqinneqalernissaannut, pisortaq siulittuivoq.
- Akigititat bilitsinut killilimmik tunineqarsinnaasunut naapertuupput. Pissutsit nalinginnaasunngoqqippata, ingerlatsinitta nalinginnaasumik ingerlaqqilernissaa sulissutigissavarput, tassunga ilanngullugit tunissassiavut akigititavullu, taanna oqarpoq.
Timmisartuuileqatigiiffik maajip qaammataata naanerani sulisunik 60-inik soqaarsitsigaluartoq, ilaasartut amerleqqinniariarpata timmisartuussisarnerit amerlineqarsinnaanngussapput, pisortaq erseqqissaavoq.
-Soorunami neriuutigaarput aappaagu ingerlalluaqqilernissarput, taamaalilluta sulisut ajornartoornermi soraarsittariaqarsimasavut atorfinitseqqissinnaanngussavavut, nalinginnaasumilli ingerlaqqilerutta pissutsit qanoq ikkumaarneri siumoorluni oqaatigiuminaappoq, Jacob Nitter Sørensen naggsiivoq.