Norsaq angalaqqilerpoq - aliikkusersuinertaqanngitsumilli

Air Greenlandip imarpik qulaallugu timmisartuutaa suliffissuarmi Frankriigimiittumi februaarip qaammataani ukiumoortumik misissorneqarpoq.

Coronap ajornartorsiortitsinerata malitsigisaanik, suliffissuarmi sulisut angerlartinneqarsimapput, misissuinerlu taamaalilluni kingusinaarluni.

Norsaq maanna Air Greenlandimi sullisseqqilerpoq.

- Nuannaarutigalugu oqaatigissavarput asasarput timmisartuuterput aappaluttoq utilermat, ingerlatseqtigiiffit Facebookikkut sapaatip akunnerani matumani siusinnerusukkut allappoq.

Ingerlatseqatigiiffiup timmisartorsuaq videokkut tassuuna aamma takutitassanngorlugu ilanngussimavaa:

Aliikkusersuutinik pilersuisartoq akiliisinnaajunnaartoq

Ingerlatseqatigiiffilli aliikkusersuinermut atortunik pisiffigineqartartoq corona pissutaalluni akiliisinnaajunnaarsimavoq.

Taamaammat angalasut aliikkusersorneqartassanngillat.

- Pisoq ajuusaarutigaarput, Siunnersuutigaarpulli angalannginnermi mobiliissinni imaluunniit tablet-isinni ilaasortaaffeqaruit ilaasortaaffissinniik(Netflix, Viaplay, HBO assigisaallu) aallereeqqullusi, Air Greenland allappoq.