aatsitassat
Nunamineralsip akiliisinnaajunnaarnera sapaatip akunnerata tulliani suliarineqassaaq
Nunamineralsip akiliisinnaajunnaartutut nalunaarutigineqarnissaa piumarineqarpoq, eqqartuussivikkoortinnissaali marlunngornermut kinguartinneqarpoq
Kalaallit Nunaata Eqqartuussiviani pigisanik eqqartuussivik marlunngormat eqqartuussissaaq, aatsitassanik ujaasinermik selskabip Nunamineralsip akiliisinnaajunnaarneranik piumasaqaat suliarissallugu.'
Taamatut KNR paasissutissiivoq.
Suliassami eqqartuussineq siulleq pivoq tallimanngormat. Aatsitassanilli ujaasinermik selskabip akiliisinnaajunnaartut nalunaarutigineqarnissaanut inatsisitigut tunngavissat eqqartuussiviup suli amigaatigimmagit eqqartuussineq kinguartinneqarpoq.
Suli ilisimaneqanngilaq selskabip akiligassaqarfiisa kikkut Nunamineralsip akiliisinnaajunnaartutut nalunaarutigineqarnissaa piumasarisimaneraat.
Akilersuinini unitsippaa
Aatsitassanik ujaasinermik selskabi piffissami 2015-imi maajip 15-ianniit 2016-imi maajip 15-iannut akilersuinerminik uninngatitsisimavoq.
Aaqqissuussinikkut ingerlatsivik inatsisitigut periarfissinneqarpoq aningaasatigut tunngavissamik nutaamik pissarsiniarnissaminut akiligassaqarfiit tapersersorsinnaasaannik, taamaanngippat selskabi akiliisinnaajunnaassammat. Akilersuinermilli unitsitsineq taamaallaat ukiumi ataatsimi atasinnaammat aaqqissuussineq qaammammi kingullermi naavoq. Tamatumalu kingorna akiliisinnaajunnaartutut nalunaarutigineqarnissaq pinngitsoorsinnaajunnaarpasippoq.
Akiliisinnaartup pigisaanik nakkutilliisoq
Pigisanik Eqqartuussiviup marlunngorpat Nunaminerals akiliisinnaajunnaartutut nalunaarutigissappagu eqqartuussivik akiliisinnaajunnaartup pigisaanik nakkutilliisumik toqqaassaaq, taassumalu pigisat nalingi akiligassallu naatsorsussavai. Naatsorsuinerlu naammassippat sinneqartoorutaasinnaasut akiligassaqarfinnut agguaanneqassapput.