Aalisarneq
Nutaanik aalisarfissarsiortoqassaaq
Aalisakkanik ikerinnarsiortunik ukioq manna aalisarnermut atatillugu misileraalluni quleriarluni aalisartoqassaaq
Naalakkersuisut arlalinnik misileraalluni ukioq manna aalisartitsinissaq akuersissutigivaat. Misileraatitsinerup siunertarivaa aalisakkat assigiinngitsut sumiiffinni ilaatigut nutaani aalisarneqarpata niuernerpalaartumik, akilersinnaasumik aalisarneqarsinnaanersut.
Aalisakkanik ikerinnarsiortunik ukioq manna aalisarnermut atatillugu misileraalluni quleriarluni aalisartoqassaaq. Aalisakkat misileraalluni aalisarneqartussat ilaat tassaallutik saarullernat, ammassassuit aamma guldlaks. Eqqusat aamma eqalussuit misileraalluni aalisarneqartussat aamma ilagissavaat, Namminersorlutik Oqartussat tusagassiutinut nalunaarummi ilisimatitsivoq.
Misileraasoqassaaq juunumi
Misileraalluni aalisarnissaq pisinnaalerpoq aalisarnermik inuussutissarsiuteqartut susassaqarfii aamma Pinngortitaleriffik ataatsimeeqatigisareerlugit. Misileraalluni aalisarnermi piumasaqaataavoq misissugassanik tigusisarnissaq, taakku peqassutsimut misissuinermi katersorneqassapput, aamma akilersinnaasumik aalisarneqarsinnaanerinut tunngaviliisussaallutik.
Aalisarnermut, Piniarnermut Nunalerinermullu Naalakkersuisoqarfiup misileraalluni aalisarusullutik qinnuteqarsimasut qinnuteqaataat maannakkut suliarileruttorpaat, naatsorsuutigineqarporlu misileraalluni aalisarnerit juunimi aallartissinnaajumaassasut.