Ove Karl apeqqarissaarfigineqassaaq

Maannakkut Inuutissarsiornermu Aatsitassanullu naalakkersuisoq Ove Karl Berthelsen Inuit Ataqatigiinneersoq pingasungnornermi ullaap tungaani aqqanerniit ullup qeqqanut Inatsisartuni apeqqarissaarfigineqarnissaminut tullinnguuppoq.

Siumut Ove Karl Berthelsenimu tapeqqutissarpassuaqarsimassaaq, juuni 2009-millimi naalakkersuisooqatigiit Inuit Ataqatigiit, Demokraatit aamma Kattusseqatigiit Partiiat illuatungiluttunit isornartorsiorneqartuartarput susassaqarfiinut tunngasunik.

– Naalakkersuisooqatigiit atulernerisa kingorna suliffissaaleqineq marloriaatinngorpoq, Siumut oqartuartarpoq, naak tamanna nunatsinni naatsorsueqqissaartarfiup kisitsisaataannut naapertuutinngikkaluartoq. Naalakkersuisut siulittaasuata Kuupik Kleistip ammaanersiornermi oqalugiarnermini suliffissaaleqinikkut kisitsit saqqummiuppai: 2006: 5,1 procent. 2007: 4,9 procent. 2008: 3,7 procent. 2009: 4,2 procent. 2010: 4,5 procent.

Aap, ukiuni kingullerni marlussunni suliffissaaleqineq annertuseriarsimavoq marloriaatinngornanili. Kisitsitillu sakkugalugit isorinnittaannermut taarsiullugu Ove Karl Berthelsenip kissaatigineruaa nunap immikkoortuini ineriartornissamut pilersaarutit eqqartornissaat, kommunit qanimut suleqatigalugit piorsaaneq aallartinneqarluni, taamaalillunilu suliffissaqarnissaq.

– Naalakkersuisut qaqugukkut aatsitassarsiorneq aallartinniaramikku, Siumup siulittaasua Aleqa Hammond ammaanersiorluni oqallinnermi aperaaq, Ove Karl Berthelsenilu akissajunnarsivoq tamanna nammineq aalajanertissaanagu aatsitassarsiortulli.