perorsaasunik amigaateqarneq
Perorsaasut: Taamaammat ilinniartunik sulisoqarniarneq ajornartorsiutaavoq
Sapaatip-akunnerata naanerani perorsaasut Ilulissani ataatsimeeqatigiipput, paaqqinnittarfinnilu perorsaasunik ilinniarsimasunik amigaateqarnermut apeqqut eqqartorneqarpoq.
Ilulissani sapaatip-akunnerata naanerani perorsaasut perorsaasunngorniallu 36-it ilungersuummeqqanerat ataatsimiinneranni takuneqarsinnaavoq. Perorsaasunik amigaateqarnerup eqqartorneqangaatsiarnera pillugu ataatsimiinnissaq aalajangiunneqarsimavoq. Perorsaasullu suliniarnerujussuartik naammagineqanngitsoq, eqimattami eqqartorneqartumi inerniliunneqarpoq.
Allakkat ammasut
Ataatsimiinnermi aaqqissuisoq, Jens Olsen Nathanielsenip erseqqissaatigaa ataatsimiinneq suleriuseq malinnagu ataatsimiinneq ingerlanneqartoq. Taamaakkaluartoq nunatsinni perorsaasut kattuffianut NPK'mut allakkamik ammasumik, akissarsiat isumaqatiginninniutigineqalerpata atorneqarsinnaasumik, nassitsisoqarsimasoq.
- Perorsaasunik ilinniarsimasunik aaqqiiniarnermi tikisitat aaqqiissutigineqarniarneri, eqqarsarnartoqartipparput. Perorsaasut nunaqavissut immikkut akissarsiaqaratik perorsaasunik tikisitanik ilinniartitsiniarnerini nukippassuarnik atuisarput. Sulilu ilungersuumminarnerusarpoq tikisitat piffissami sivikitsumi atorfeqareersimallutik angerlanialeraangata, perorsaasut Ilulissani ataatsimiinnerminni inerniliussaqarput.
Suliffiit nikerartut
Meeqqanut inuusuttunullu immiikkortoqarfimmi perorsaasut aamma tikkuarpaat sulinerit nikerarsinnaasarneri, tamannalu allanik suliffissarsiortarnermut peqqutaaqataanerarlugu tikkuarlugu.
- Suliani assigiinngitsuni pisaqartitsineq aallaavigalugu meeqqat inuusuttullu ilaqutaannik oqaloqatiginnittarpugut. Oqaloqatiginninnerullu naliginnaasumik suliffiup avataatigut pinerusarput, taamatullu sulineq naammaginartumik akissarsissutigineqarneq ajorpoq, perorsaasut oqarput.
Aamma atuaruk: Perorsaasut pillugit sakkortuumik oqallinneq sallunik tunngaveqartoq
Perorsaasunillu amigaateqarnerup kingunerisa ilagaat paaqqinnittarfinni perorsaariaatsimik sunniuteqarnerlunnera, perorsaasutulli ilinniarsimasut ilinniakkatik tamakkiisumik atorluarsinnaaneq ajorlugit.
Akissarsianik naleqqussaaneq
Ilulissanilu ataatsimiinnermi aaqqissuisut inerniliussartik, perorsaasut akissarsiaasa qaffaavigineqarnissaanut atorsinnaasaat NPK'mut nassiussimavaat.
Aamma atuaruk: Nivi Olsen: Perorsaasut tikisitat nunaqavissullu assigiimmik atugaqassapput