Ilulissat
Pisiffik Ilulissani nioqqutissat amigaataanerannik nassuerutiginnittoq
Pisiniarfissuaq Qeqertarsuup Tunuani nioqqutissanik qerisuunngitsunik amerlanernik peqalernissaa siunertaralugu isiginninniarnerulernissamik neriorsuivoq
- Tamanna pitsaanerusumik suliarisinnaasariaqarparput. Nioqqutissanik amerlanernik inniminniissaagut!
Pisiffimmi tuniniaanermut nittarsaassinermullu pisortaq Niels Andersen, Ilulissani innuttaasoq Tuperna Heinrich najukkami pisiniarfimim nioqqutissanik amigaateqarneq akerliussutsimik takutitsiviginiarlugu atsiornernik katersinermik aallartitsereersorlu, taama oqarpoq.
Nioqqutissat qerisuunngitsut amigaataasut
Tuniniaanermut nittarsaassinermullu pisortaq ullut arlaqanngitsut matuma siorna Ilulissani pisiniarfimmut takuniaavoq. Immummillu tunisassiat kiisalu paarnat naatitallu nutaat amigaataasinnaanerannik oqalunneq ilisarisinnaanerarlugu.
- Sapaatiummat (juulip 26-ani, aaqq.) ilisiviit imaqanngingajapput, naak punnernik, manninnik, yoghurtinik allanillu peqartussaagaluartoq. Ullualuit qaangiummata nioqqutissanik nutaanik pissarsivugut, ilisiviillu imaqarlualerlutik. Kisianni nioqqutissanik ikippallaanik nalinginnaasumik inniminniisarnerput nassuerutigisariaqarparput, taamaattumillu pineqartumik isiginninniarnerulissalluta, Niels Andersen erseqqissaavoq.
Tuperna Heinrichip ajornartorsiutip ukiuni arlalinni atuuttarsimanera pisiniarfimmilu nioqqutissanik nalinginnaasumik amigaateqartoqartarnera misigisarsimavaa. Pissutsilli taama ajortiginngitsut tuniniaanermut nittarsaassinermullu pisortaq isumaqarpoq.
- Pisiniarfimmut takuniaagama peqqumaasivimmi nalinginnaasumik nioqqutissarpassuaqarpoq, nerisassat qerisuunngitsut eqqumaffigeriikkavut eqqaassanngikkaanni. Ukioq mannali siusinnerusukkut umiarsuit tikittarnerisa nalinginnaasumik akuttuneruffigisaanni soorunami immikkuullarissunik unammilligassaqarsimasinnaavoq, Niels Andersen oqarpoq.
Oqimaaqatigiissaariniarneq
Taanna nioqqutissanik amigaateqartoqarsinnaaneranut pissutaasinnaasunik arlalinnik tikkuagaqarpoq.
- Nillataartitat kiisalu paarnat naatitallu nutaat qillertuusamiittunut, nangernut equutissianullu sanilliullugit sivikitsumik atanertussuseqarput. Taamaattumik naammattunik pisiniartarnissarput, tamatumalu peqatigisaanik eqqaasariaqalissutigisatsinnik amerlanaarivallaannginnissarput oqimaaqatigiissaarniartariaqarput. Kiisalu Ilulissani aasaanerani takornariarpassuaqartanerata silllimaffiginissaanut pikkorinnerulertariaqarpugut, Niels Andersen nassuiaavoq.
Aamma atuaruk: Pisiffimmut akerliussutsimik takutitsineq: Imigassaasiviit kisimik ulikkaaqqapput (qallunaatut)