Pisiffiup iffiukkat imatut oqunnaveersaartinniarpai
Iffiat seernarnerulaalersinnerisigut Pisiffiup neriuutigaa iffiukkat oquttarunnaassasut
Pisiffiup ajuusaarutigaa pisiniarfiutileqatigiiffiup pisisartui nuanninngitsumik misigisaqarsimanerat iffiukkanillu oquttunik tuniniaasutut Pisiffimmik isornartorsiuinerat. Tamanna pivoq ilaqutariit Ananiassen-ikkut sapaatiummat nittartakkami oqaluttuarmata ilaqutariit iffiugaq Nuummi Pisiffimmi pisiaat oqulersimasoq, ulloq tunitsivissaa kingulleq suli qaangiutinngikkaluartoq.
Atuaruk: "Nerisassatoqaq nutaamik poorlugu?"
– Pisisartutsinnut ajuusaarutigissavara iffiamik, pitsaassutsimut piumasaqaatitsinnik naammassinninngitsumik, pisisimmammata. Tamanna iffiortutta pikkorikkaluartut tusaamasaassutigerusunngilaat, Pisiffik A/S-ip pisortaanera Per Steen Larsen oqarpoq.
– Sapaatiummat ullumilu ataasinngornermi pilersuisorput, tamassuminnga misissuisunik sulisulik, attaveqarfigaarput. Taakkua isumaqarput iffiaq oquttoq pissuteqartoq oqummik, silaannarmi nillertumi annikitsumillu isugutasumi pilersartumik, taakkualu marluk Kalaallit Nunaanni atugaapput.
– Iffiukkat seernarnerulaalersinnerisigut - 1 procentimiit 4 procentimut - neriuutigaarput ajornartorsiut qaangissallutigu. Tamatumuunakkut oquk pilersikkuminaannerulissaaq, Per Steen Larsen oqarpoq.
– Qaqugu iffiat seernarnerulaalersissavisigit?
– Ingerlaannaq taamaasiorpugut. Taamatulli oqariarlunga stoffit akuutissat suulluunniit atorusuppallaanngilagut.
– Iffiat oqunnissaat pinngitsoorniarlugu suleriaasersi allanngortippisiuk imaluunniit allanngortissavisiuk?
– Aap, ullumimiit taamaasiorpugut. Ilaatigut ullut tamaviisa iffiukkatsinnit iffiat tallimat immikkoortittassavagut, taamaasilluni iffiortut naalagaata iffiortullu malinnaaffigisassalugit, takullugu iffiaq ulloq ataaseq, marluk pingasullu ingerlaneranni qanoq ilisarnersoq, Per Steen Larsen oqaluttuarpoq.
– Allaaserisatsinni ilaqutariit ilaatigut oqarput: ´Tamanna akuersaarneqarsinnaanngilaq, Pisiffillu pasinarsinnaavoq iffiukkat poortoqqittarai, nutaatullu tuniniaqqillugit. Tamatumunnga qanoq oqassavit?´
– Oqaannarsinnaavunga iffiukkat poortoqqinngisaannarivut.
Pisiffiup pisortaanerata kikkut tamaasa kajumissaarpai uummammioqarunik pisiniarfimmut saaffiginneqqullugit.