sullivimmi avatangiisit
Pisortaq imminut illerpoq: Taamaattumik sullivimmi avatangiisitigut pisorpassuaqarsimavoq
Aappaluttumi piiaaffiup piumasaqaaterpassuit naammassissavai, Sullivinnik Nakkutilliisoqarfimmut Aatsitassanillu Aqutsisoqarfimmut nalunaarusiortarluni, pisortaq oqarpoq. Piiaaffimmi ulorianarnersaasimagunarpoq piiaaffiup cafeteriaa
Pingasunngormat Qanoruup oqaluttuaraa Qeqertarsuatsiaani rubininik piiaaffissami ukiup ataatsip ingerlanerani sulinikkut 19-inik ajutoortoqarsimasoq. Sulinermili ajutoornernik kisitsisit eqqortut arfineq-marluupput, pisortaq Sermitsiaq.AG-mut oqaluttuarpoq.
– Oqargisinnaavakkit sulinermi ajutoornerit taama amerlatigimmata, aammalu oqartussaasunit uparuarneqartarsimasugut, Bent Olsvig Jensen oqarpoq, taannalu LNS Greenland sinnerlugu oqaaseqarpoq, Sullisivinnik Nakkutilliisoqarfiup peqqussutit suliassallu tassunga tunngatimmagit.
– Uagut (True North Gems, aaqqiss.) piiaaffimmut akuersissummik piginnittuuvugut, taamaattumik sulinermi avatangiisinik ajutoortoqarpallu tamakkuninnga Aatsitassanut Aqutsisoqarfimmut nalunaaruteqartartussaavugut. Sulinermi ajutuungajannernik taaneqartartut ilanngullugit aqutsisoqarfimmut nalunaarutigisarsimavagut, pisortaq nassuiaavoq.
Tamaasa ataatsimoortillugit
Qanoruup kingornalu aamma Sermitsiaq.AG-0 tamatumuuna suliassat Sullivinnik Nakkutilliisoqarfimmeersut Aatsitassanillu Aqutsisoqarfimmeersut kisissimavaat. Sulinermi ajutoornerit katillutik arfineq-marluupput ajutuungajannermillu tananeqartut 12-iullutik.
– Ajutuungajannernik atugaqartarsimavugut, assersuutigalugu kiassaat kissatsippallaarsimasoq, paasineqanngikkuni ikuallannermik kinguneqarsimasinnaasoq, aammalu eqqaamavara lastbiili uppingajassimasoq. Tassa pisut inuit ajoqusernerannik kinguneqanngitsut, nalunaarsorlugilli oqartussaasunut nalunaarutigisavut, Olsvig Sermitsiaq.AG-mut itisiliivoq.
Ajutoornerit nassuerutigai
Taassuma nassuerutigaa selskabip rubinisiortup entreprenøria, LNS Greenland, sulinermi arfineq-marloriarluni ajutoorsimasoq, taakkunanngalu marlssuit assersuutitut taavai.
– Eqqaamavata ataatsip seeqquni pillutsissimagaa quasarnera pissutigalugu. Taavalu ullut ilaanni sulisoq skærebrænderimik atuilluni savimernup aamaanik støvlimigut eqqortissimavoq uutiterlunilu.
– Allalu aamma sioqqanik ississimavoq, tamannalu aamma nalunaarutigaarput, pisortaq oqarpoq.
Sulinermi ajutoorneq ajornerpaaq eqqaamavaa piiaaffiup kantiinaani pisimasoq.
– Igasut marluk assammikkut savimmik kilersimapput, tamannalu aamma nalunaarutigaarput. Aappa itingaatsiartumik kilersimalluni.
Ajutuungajannerit taaneqartut ilaat ataasiinnaq True North Gemsimi pisimavoq, LNS Greenlandimi pinnani.