Portørit akissarsiat pillugit isumaqatiginninniarnermi nutaanik piumasaqaateqarput
Portørit eqimattat tallimanngornermi ataatsimiinnerminni sulinermi atukkatik oqaluuserilluarpaat. Piumasaqaatitik kattuffimmut nassiuppaat.
Portørit arlallit napparsimmaveqarfinni immikkoortunit tamaneersunit peqataaffigineqartut, akunnerni sisamanik sivisussusilimmik ataatsimiinnissaq siumut kalerriutigisartik ingerlallugu tallimanngormat sulinerminnik unitsitsipput.
- Ataatsimiinneq angusaqarfiulluarpoq. Sulinermi atukkagut, aamma akissarsiat pillugit isumaqatiginninniarnermi piumasaqaataasut kingulliit oqaluuseraagut, Hansine Thorin, Dronning Ingridip napparsimmavissuani portøri, taama oqarpoq.
Akissarsiat assigiinnginneri
Portørit ataatsimiinnerminni akissarsiatik assigiinngissinnaasartut paasivaat, ilaallu tapinik isumaqatigiissutikkut pisartagassaraluaminnik pisarsimanngitsut.
- Ataatsimiinnitta kingorna piumasaqaatigut kissaatigullu SIK-mut sinniiserput aqqutiglugu nassiuppagut, Hansine Thorin oqaluttuarpoq, akissarsiat pillugit isumaqatiginninniarnerit suli ingerlammata kissaatitik saqqummiussinnaanagit taassuma oqaatigaa.
Akissarsiat tiimimut 0,92 koruuninik qaffanneqarnissaannik Naalakkersuisut neqeroorutigisaat portørit naammaginngilaat. Sulinerullu nalaani ajoqusertoqarsinnaanera pissutigalugu sillimmaserneqarnissaminnik piumasaqarput, ilanngullugulu piumasaralugu sulinngiffeqarnermi angalanermut akiliutsittalernissaq.
SIK-mi siulersuisut ataatsimiinnissaat
Sulinermik inuussutissarsiuteqartut kattuffianni, SIK-mi siulittaasoq Jess G. Berthelsen, Namminersorlutik Oqartussanit aamma kommuninit isumaqatiginninniarluni ataatsimiinnissamut ataasinngornermi ullaap tungaani suli qaaqquneqarsimanani ilisimatitsivoq.
SIK-mi siulersuisunut ilaasortat pingasunngorpat ataatsimiissasut taanna ilisimatitsivoq, tassani isumaqatiginninniarnerit aamma alloriarnissap tulliat oqaluuserineqassallutik.
- Utaqqivugut. Isumaqatiginniarnerit aallarteqqingajalissasut neriuutigaarput, Jess G. Berthelsen oqarpoq.