Qaanaaq Pittufimmik pinngitsuuisinnaasariaqarpoq
Borgmester Jess Svane (S) Kuupik Kleistip Kalalllit Nunanani angallannermik aaqqissuuneq inerisarneqarnissaanut najugaqartut pisariaqartitaat aallaaviusariaqartut aallaaviginiarpai
Qaasuitsup Kommuniani Naalakkersuisut assartuinermut tunngasuni Naalakkersuisut nalunaarutaat pissangalluta malinnaavigisimavarput, borgmester Jess Svane tusagassiivinnut allappoq.
Borgmester Jess Svanep nuannaarutigaa Naalakkersuisut siulittaasuata aallaavigerusummagit inuiaqatigiit pisariaqartitaat amerikkamiut sakkutooqarfii pinnagit.
Jess Svane neriuutigaa tamanna aamma Qaanaami innuttaasunut atuutissasoq Pituffimmut pinngitsuueqqissinnaanngitsutut inisseqqinneqaqqissanatik.
Siunissami pisariaqartitat
Naalakkersuisut nunap iluani aaqqissuussaanerup ilusilersorneqarnera innuttaasut pisariaqartitaannik aallaaveqartitserusupput. Borgmesteri isumaqataavoq.
”Uagulli politikeritut pisariaqartitaannarnik isiginninniassanngilagut – aammali aningaasalersuutissanik, taamaasilluni siunissaq ilusilersorneqassalluni politikkitsinnik takorluukkatsinnillu,” Jess Svane oqarpoq.
Qaasuitsup Kommuniani kommunalbestyrelsep naatsorsuutigaa ikummatissarsiorneq, takornariaqarneq, aalisarneq inuussutissarsiutinillu ineriartortitsineq siunissami aningaasaqarnikkut aningaasaqarnikkut imminut nammattuunermut akiliuteqarumaartut.
Aningaasalersuinissamilli pisariaqartitsisoqassaaq. Aningaasalersuinissamik pisariaqartitsisoqassaaq inuussutissqarsiutitoqqat nutaallu nukittorsarneqassappata.
Mittarfik kisimi pineqanngilaq. Aammattaaq ilaatigut borgmesterip tikkuarpai Upernavimmi Uummannamilu umiarsualiviit pitsanngorsarneqartariaqarnerat, Qeqertarsuarmi erngup nassiussuunneqarsinnaanera Ilulissanilu umiarsualivissaq pillugu pilertornerusumik iliuuseqarnissaq.
Periarfissat allat
Jess Svane isumaqarpoq Ilulissani mittarfiup tallinissaa periarfissaasariaqartoq taamaasiornikkut takornariaqarnerup nukittorsarlugulu siammarterneqarsinnaaniassammat.
”Ilulissani mittarfiup tallinera siunissami periarfissaasariaqarpoq. Periarfissaq uagut angalanerinnatsinnit aningaasalersorneqassanngitsoq, kisiannili siunissami takornarissanit ikummatissarsiornermilli sulisunit, avataaniit aningaasaatiminnik nassartunit”, Jess Svane oqarpoq.
Qaasuitsup Kommuniani borgmesterip neriuutigaa Naalakkersuisut periarfissanik arlaqarnerusunik mittarfiit pillugit ammatitsisumaartut, siunissamimi pisariaqartitsineq ullumikkutut iinnarunnanngimmat.