Qalerallit pisarineqartut ikileriarneri Halibut Greenlandimut eqquivoq
Halibut Greenland millioninik amigartooruteqarpoq
Qeqertarsuup tunuani qalerallit pisarineqartut ikileriarnerat Halibut Greenlandimut eqquivoq.
Tassami pisarineqartut affaannanngorsimapput. Ukioq kingulleq qalerallit 7.268 tonsit pisarineqarput, ukiut marluk matuma siorna 13.331 tonsiullutik.
Halibut Greenlandimut tunineqartut taamaasillutik ikinnerujussuupput.
Halibut Greenland 8 million koruuninik sinneqartoornissamut naatsorsuuteqarsimagaluarpoq, 15,2 million koruuninilli amigartooruteqarpoq.
Ukioq kingulleq tassaarsuartoqarnera suliffeqarfimmut aamma eqquivoq. Uummannami aalisakkerivimmik nutaamik sanaartortoqaraluarpoq, tassaarsuartoqarnerali pissutaalluni suliaq unitsinneqarallarluni. Suliffeqarfimmut 6,9 million koruuninik tamanna naleqarpoq.
2018-mi sinneqartoortoqarnissaa siulersuisunit naatsorsuutigineqarpoq.