Qaqortumi mittarfissaq anorimit sunnertikkuminartumi sanaartorneqassaaq
Qaqortumi mittarfissaq pilersaarut malillugu inissaaniitsillugu Kalaallit Airportsimit sanaartorneqartussanngortinneqarpoq. Mittarfik 2023-mi naammassissangatinneqarpoq.
Qaqortumi mittarfissaq atorneqalerpat angalanissanik unitsitsiinnarnerit kinguaattoornerillu naatsorsuutinut ilannguttariaqarput. Mittarfiummi inissaattut siunniussaq inissisimaffigalugu mittarfiliortoqarnissaanik Kalaallit Airports tamakkiisumik aallartitsipput.
- Sanaartornissamut inatsisip akuerineqarnerani aammalu anorlertarneranik misissuinerit ilassutaasussat kissaatigineqartut ilaasa naammassineqarneranni, Qaqortumi mittarfissamik sanaartornissamut pilersaarusiorneq aallartissinnaalersimavarput, Kalaallit Airports A/S-imi pisortaq, Steffen Ulrich-Lynge, tusagassiutinut nalunaaruteqarluni allappoq.
Inissisimaffik pitsaanerpaaq
Sunnertianissamik ajornartorsiuteqartoq maajimi saqqummiussisoqaraluartoq, mittarfik pilersaarut malillugu inissisimaffissaatut aalajangiussami sanaartorneqassaaq.
- Mittarfissap nuunnissaanut periarfissaqanngilaq. Inissisimaffiit arfineq-marluk misissorsimavagut, unalu pitsaanerpaavoq, Steffen Ulrich-Lynge Sermitsiaq.AG-mut oqarpoq.
Upernaarli nalunaaruteqarneq allaaneruvoq.
- Anorip sunniisinnaanera 75-imiittoq maanna misissuinerit takutippaat. Tamanna naammannginanngilluinnarpoq. Isumanga malillugu taassuma 90 angusariaqarpaa, Kalaallit Airporstimi siulersuisuini siulittaasoq Johannus Egholm Hansen maajip 17-iani oqarpoq.
Sunniisinnaassusaani pitsanngoriaateqanngilaq
Anorip silaannaallu misissuiffigineqaqqinnissaaa aalajangerneqarpoq, sunniisinnaaneralu pitsanngorsarniarlugu timmisartorfigalugu misilittaasoqassalluni.
- Misissuinerit taakkua ilai naammassineqareerput, taamatullu sumiiffimmit ukiumi ataatsimi anorimik uuttortaanerit annertunerusut pigineqalerlutik. Kisiannili misileraalluni timmisartornerit kissaatigineqartut ingerlanneqarsinnaasimanngillat, ilaatigut silamik pissuteqartumik anigorniagassaqarsimaneq pissutigalugu, ilaatigullu ingerlasussanik piareersaanikkut anigorniagassaqarneq pissutigalugu, Kalaallit Airports A/S paasissutissiivoq.
Anorip sunniisinnaanera suli 75-imiippoq pitsanngoriartinneqarsinnaasimananilu.
- Anorip sunniisinnaanera pillugu allanngortoqarnikuunngilaq, Steffen Ulrich-Lynge Sermitsiaq.AG-mut oqarpoq.
Kalaallit Airports A/S-ip ingeniørit suliffeqarfiat COWI, aamma Nuummi aamma Ilulissani mittarfissat sanaartornissaannut pilersaarusiortuusoq, aammalu Masanti A/S-imik Kalaallit Nunaanneersumik siunnersortitut atuisussaq, Qaqortumi mittarfissamut sanaartornissamut pilersaarusiorneq piaartumik aallartinneqassasoq, isumaqatigiissuteqarfigaa.
Politikkikkut aalajangerneq
Qaqortumi mittarfissamut 2019-imi aammalu illutasaannut 2020-imi sanaartornissamut pilersaarusiorneq ingerlanneqassasoq pilersaarutigineqarpoq. 2020-imi aasaanerani mittarfiup sanaartorneqarnera aallartinneqassaaq aammalu 2021-imi aasaanerani illutassaasa sanaartorneqarnerat allartinneqassalluni.
- Tunngavissat pigineqartut tunngavigalugit sanaartornissamut pilersaarusiorneq aallartinneqassasoq Kalaallit Airports A/S aalajangerpoq, taamaalilluni oqartussanit akuersissutit sinneruttut qinnuteqaatigineqarsinnaalissallutik aammalu mittarfissamut sanaartornermi suliassanut neqeroortitsinermut najoqqutassat suliarineqarsinnaalissallutik. Peqatigisaanik aalarulunneranik ilimasaareriaasissamut, mittarfissani pingasuni tamaginni pilersinneqartussamut atugassamik, anorimik uuttortaanerit annertunerusut aammalu aalaruluttarneranik misissuinerit suliarineqarnerat ingerlaannassaaq, Steffen Ulrich-Lynge tusagassiutinut nalunaarummini allappoq.
Imalu oqaaseqarluni ilassuteqarpoq:
- Mittarfiliortoqassasoq politikkikkut aalajangerneqareerpoq.
Qaqortumi mittarfissamut piffissaq sanaartorfiusussaq, mittarfissat sinnerinit sivikinnerusussaammat, Qaqortumi mittarfissaq Nuummi aamma Ilulissani mittarfissat peqatigalugit naammassissasoq, suli siunnerfigineqarpoq – tassalu 2023-imi qaammatini pingasukkaani kingullerni.